ഐന്‍ ഗേഡി: ചാവു കടല്‍ നീന്തിക്കടന്ന് ചരിത്രം സൃഷ്ടിച്ച് ഒരു കൂട്ടം പരിസ്ഥിതി പ്രവര്‍ത്തകര്‍. ജോര്‍ദാന്‍ മുതല്‍ ഇസ്‌റാഈല്‍ വരെ 15 കിലോ മീറ്റര്‍ ദൂരമാണ് 28 പേര്‍ നീന്തിക്കടന്നത്. മധ്യധരണ്യാഴിയിലെ ഇക്കോപീസ് എന്ന സംഘടനാ പ്രവര്‍ത്തകരാണിവര്‍.

ഉള്‍നാടന്‍ തടാകങ്ങളുടെ വ്യാപ്തി 30 വര്‍ഷം കൊണ്ട് മൂന്നിലൊന്നായി ചുരുങ്ങിയതിന്റെ ഭാഗമായി ബോധവല്‍ക്കരണം നടത്തുന്നതിനു വേണ്ടിയാണ് സാഹസിക നീന്തല്‍ നടത്തിയത്.

വായിലും മൂക്കിലും വെള്ളം കടക്കാതിരിക്കാന്‍ പ്രത്യേക മുഖാവരണവും മാസ്‌കും ധരിച്ചാണ് എല്ലാവരും ഉപ്പു നിറഞ്ഞ ചാവുകടല്‍ നീന്തിക്കടന്നത്. സാധാരണ കടലുകളേക്കാള്‍ പത്തു മടങ്ങ് ഉപ്പിന്റെ അംശം കൂടുതലാണ് ചാവുകടലില്‍.

നീന്തല്‍ സംഘത്തെ സഹായിക്കാന്‍ വൈദ്യസംഘവും കൂടെയുണ്ടായിരുന്നു. ചാവുകടലിലെ വെള്ളം ഇറങ്ങിയാല്‍ ഉടനെ ചികിത്സിച്ചില്ലെങ്കില്‍ മാരക അപകടം വരുമെന്നതിനാലാണിത്.

കുറച്ച് തുള്ളികള്‍ കണ്ണില്‍ തൊട്ടപ്പോള്‍ ആസിഡ് ഒഴിച്ച പോലെ അനുഭവപ്പെട്ടുവെന്ന് കിം ചാമ്പേഴ്‌സ് എന്ന നീന്തല്‍ സംഘത്തിലെ സ്ത്രീ പറഞ്ഞു.

ഇസ്‌റാഈലിന്റെയും ജോര്‍ദാനിന്റെയും ഖനനമാണ് ചാവു കടലിന്റെയും സമീപ തടാകങ്ങളുടെയും നശീകരണത്തിന് വകവയ്ക്കുന്നതെന്ന് ഇവര്‍ പറയുന്നു.

ഇസ്‌റാഈല്‍, ജോര്‍ദാന്‍, അധിനിവിഷ്ട വെസ്റ്റ് ബാങ്ക് (ഫലസ്തീന്‍) എന്നിവ അതിര്‍ത്തി പങ്കിടുന്ന, കടല്‍ നിരപ്പില്‍ നിന്ന് 425 മീറ്റര്‍ (1400 അടി) താഴെയാണ് ചാവു കടല്‍ സ്ഥിതി ചെയ്യുന്നത്.