നൂറുകണക്കിന് വിഭവങ്ങളൊരുക്കി
കുട്ടിപ്പാചകക്കാര്‍

കല്‍പ്പറ്റ: തീന്‍ മേശകളില്‍ മൂന്നു മണിക്കൂറില്‍ കുട്ടിപ്പാചകക്കാരുടെ കൈകളില്‍ ഒരുങ്ങിയത് നൂറുകണക്കിന് വിഭവങ്ങള്‍. ജില്ലാ ശാസ്ത്രമേളയില്‍ എത്തിയ പാചക മത്സരത്തില്‍ ഒന്നിനൊന്നു മികച്ചതായിരുന്നു വിഭവങ്ങളോരോന്നും.
അമ്പതു മുതല്‍ നൂറുവരെ വിഭവങ്ങാെരുക്കിയാണ് മത്സരാര്‍ഥികള്‍ മാറ്റുരച്ചത്.
പരമ്പരാഗത ഇനങ്ങള്‍ മുതല്‍ പുതിയ കാലത്തേതും വിദേശിയുമായ വിഭവങ്ങളും മേശകളില്‍ നിരന്നു. മുളയരി പായസം മുതല്‍ ചക്കക്കുരു പായസം വരെ മുപ്പതോളം പായസങ്ങള്‍.
അമ്പതോളം ഇലകളുടെ തോരന്‍, കുഞ്ഞുങ്ങള്‍ക്ക് നല്‍കുന്ന മധുരക്കിഴങ്ങ്, ചോളം, കൂവ, മത്തന്‍, ചേന, പഴം, ചക്കക്കുരു തുടങ്ങിയവയുടെ കുറുക്കുകള്‍. കണ്ടാല്‍ നാവില്‍ വെള്ളമൂറുന്ന അമ്പതോളം അച്ചാറുകള്‍, കാട്ടുമുന്തിരി സാലഡ് തുടങ്ങിയവയാല്‍ സമ്പന്നമായിരുന്നു പാചകമത്സരം.