നസേറത്ത്: പള്ളികളില്‍ ബാങ്ക് വിളിക്കുന്നതിന് ഉച്ചഭാഷിണികള്‍ തടഞ്ഞുകൊണ്ടുള്ള മുഅസ്സിന്‍ ബില്‍ ഇസ്രാഈല്‍ മന്ത്രിസഭ പാസാക്കി. ശബ്ദ മലിനീകരണം കുറയ്ക്കുന്നതിനു വേണ്ടിയെന്ന കാരണം കാണിച്ച് കഴിഞ്ഞ ഞായറാഴ്ചയാണ് ബില്‍ മന്ത്രിസഭാ കമ്മിറ്റി പാസാക്കിയെടുത്തത്.

ബില്‍ ബുധനാഴ്ച ഇസ്രാഈല്‍ പാര്‍ലമെന്റില്‍ വോട്ടിനിട്ടെങ്കിലും ജൂത മത പാര്‍ട്ടിയുടെ ചെറിയ എതിര്‍പ്പിനെത്തുടര്‍ന്ന് പാസാക്കുന്നത് വൈകി.

അതേസമയം, ആരോഗ്യമന്ത്രി യാക്കോവ് ലിറ്റ്‌സ്മാനും ബില്ലിനെതിരെ രംഗത്തുവന്നിട്ടുണ്ട്. ജൂതപ്പള്ളിയില്‍ നടക്കുന്ന ശബാത്തിന്റെ തുടക്കത്തിലും അവസാനത്തിലും സൈറണ്‍ മുഴക്കുന്നതിനെയും ബില്‍ എതിര്‍ക്കുന്നുവെന്നു കാണിച്ചാണ് തടഞ്ഞത്.

എന്നാല്‍ പ്രധാനമന്ത്രി ബെഞ്ചമിന്‍ നെതന്യാഹുവിന്റെ പിന്തുണയുള്ള ബില്‍ വൈകാതെ പ്രാബല്യത്തില്‍ വരുമെന്നാണ് കരുതുന്നത്.

ബില്ലിനോട് ശക്തമായ ഭാഷയിലാണ് ഫലസ്തീനിയന്‍ പാര്‍ട്ടികള്‍ പ്രതികരിച്ചത്. ഇസ്‌ലാമോഫോബിയയുടെ വൃത്തികെട്ട ഉല്‍പന്നമാണ് ബില്ലെന്നാണ് അബ്രഹാം ഫണ്ട് നേതാവ് താബെത് അബൂ റാസ് പറഞ്ഞത്. ജൂത- മുസ്‌ലിംകള്‍ക്കിടയില്‍ സമാധാനമുണ്ടാക്കാന്‍ ശ്രമിക്കുന്ന സംഘടനയാണിത്.

ജൂത പാര്‍ട്ടികളുടെ എതിര്‍പ്പ് മറികടക്കാന്‍ അവരുടെ പള്ളികളെ ഒഴിവാക്കി മുസ്‌ലിം പള്ളികള്‍ക്കു മാത്രമായി നിയമം കൊണ്ടുവരുമെന്നും താബെത് അബൂ റാസ് പറഞ്ഞു.