മട്ടാഞ്ചേരി നെടുമ്പാശ്ശേരി: കേന്ദ്ര സര്‍ക്കാരിന്റെ നോട്ട് നിരോധനം വിദേശ സഞ്ചാരികളെയും വലച്ചു. പൈതൃകനഗരിയായ ഫോര്‍ട്ട്‌കൊച്ചിയിലും മട്ടാഞ്ചേരിയിലും എത്തിയ വിദേശികള്‍ തങ്ങളുടെ കൈവശമുള്ള കറന്‍സികള്‍ മാറുന്നതിന് എ.ടി.എം ന് മുമ്പില്‍ ക്യു നില്‍ക്കേണ്ട ഗതികേടിലാണ്.
പലര്‍ക്കും കുപ്പി വെള്ളം വാങ്ങാന്‍ പോലും കൈയില്‍ പണമില്ലാതായി. നോട്ട് നിരോധനം പ്രാബല്യത്തില്‍ വരുത്തുമ്പോള്‍ ആവശ്യമായ സജ്ജീകരണങ്ങള്‍ വരുത്താതെ പൊതു ജനത്തെ ക്യുവില്‍ നിര്‍ത്തുന്നത് ആസുത്രണ മികവിലെ പരാജയമാണെന്ന് സ്വിസ്റ്റര്‍ലാന്റ് വനിത ലെസ്ലി പറഞ്ഞു.
നെടുമ്പാശ്ശേരി വിമാനത്താവളത്തിലെത്തിയ വിനോദ സഞ്ചാരികളും നോട്ട് നിരോധനത്തില്‍ നട്ടം തിരിഞ്ഞു. അടുത്ത ദിവസങ്ങളിലായി കേരളത്തിലെ വിനോദ സഞ്ചാര കേന്ദ്രങ്ങള്‍ സന്ദര്‍ശിക്കുന്നതിനും ചികിത്സക്കും മറ്റുമായി വിദേശത്ത് നിന്നും എത്തിയവരാണ് ഏറെ കഷ്ടത്തിലായത്. പലരും ഇവിടെ എത്തിയതിനു ശേഷം ഉപയോഗിക്കുന്നതിനായുള്ള സൗകര്യത്തിനായി ഇന്ത്യന്‍ കറന്‍സി നാട്ടില്‍ നിന്നുതന്നെ ശേഖരിച്ചാണ് എത്തുന്നത്. 500,1000 രൂപയുടെ നോട്ടുകളാണ് ഇത്തരത്തില്‍ ഇവരുടെ കൈവശം ഉള്ളത്. കേരളത്തില്‍ എത്തിയ ശേഷം ഇവ മാറ്റിയെടുക്കാന്‍ സാധിക്കാത്ത അവസ്ഥയിലാണ് ഇവര്‍.
ബാങ്കുകള്‍ വഴി നോട്ടുകള്‍ മാറ്റിയെടുക്കുന്നതിന് സര്‍ക്കാര്‍ നിര്‍ദ്ദേശിക്കുന്ന ആധാര്‍ കാര്‍ഡ് ഉള്‍പ്പെടെയുള്ള രേഖകള്‍ ഇല്ലാത്തതിനാല്‍ ബാങ്കുകള്‍ വഴി കറന്‍സി നോട്ടുകള്‍ മാറ്റിയെടുക്കാനും ഇവര്‍ക്ക് നിര്‍വാഹമില്ല.
ഇന്നലെ 1000 ത്തിന്റെയും 500 ന്റയും നോട്ടുകള്‍ കൈവശം വച്ച് ആഹാരം കഴിക്കാന്‍ പോലും കഴിയാതെ വിമാനത്താവളത്തിന്റെ പരിസരത്ത് നട്ടം തിരിയുകയായിരുന്ന രണ്ട് തുര്‍ക്കി സ്വദേശികള്‍ക്ക് രണ്ട് എയര്‍ലൈന്‍ ജീവനക്കാരാണ് സഹായത്തിനെത്തിയത്. വിദേശികളായ ഇവരുടെ അവസ്ഥ മനസ്സിലാക്കിയ ജീവനക്കാര്‍ ഉച്ചഭക്ഷണം വാങ്ങി നല്‍കുകയും 3000 രൂപയുടെ നോട്ട് മാറി നല്‍കുകയും ചെയ്തു.