സ്വന്തം ലേഖകന്‍

കൊല്ലം: പീഡനകേന്ദ്രമായി കുണ്ടറ പൊലിസ് സ്റ്റേഷന്‍ മാറുന്നു.
നിരവധി കസ്റ്റഡി മരണങ്ങളുടേയും മര്‍ദ്ദനങ്ങളുടെയും പേരില്‍ അടുത്തകാലത്ത് കുപ്രസിദ്ധിയാര്‍ജ്ജിച്ച പൊലിസ് സ്റ്റേഷനില്‍ ഏറ്റവുമൊടുവിലത്തെ ഇരയായത് ജനകീയനായ സി.പി.ഐ നേതാവായിരുന്നു. സി.പി.ഐ കുണ്ടറ മണ്ഡലം സെക്രട്ടറിയേറ്റ് അംഗം ഡോള്‍ഫസാ(62)ണ് പൊലിസ് അതിക്രമത്തെത്തുടര്‍ന്ന് മരിച്ചത്.
ബുധനാഴ്ച വൈകിട്ട് 6.30 ഓടെ മരുന്ന് വാങ്ങാന്‍ സി.പി.ഐ പ്രവര്‍ത്തകനായ ആന്റണിയുടെ സ്‌കൂട്ടറിന്റെ പുറകിലിരുന്ന് കുണ്ടറയിലേക്ക് പോയ ഡോള്‍ഫസ് രാത്രി 9ഓടെ കൊല്ലത്തെ സ്വകാര്യ ആശുപത്രിയില്‍ മരിച്ചു. ബ്രയിന്‍ ട്യൂമര്‍ ബാധിതനായിരുന്ന ഡോള്‍ഫസ് ട്യൂമര്‍ നീക്കം ചെയ്തതിനുശേഷം സ്ഥിരമായി കഴിക്കുന്ന മരുന്ന് വാങ്ങാനാണ് പോയത്. സ്‌കൂട്ടറോടിക്കാത്ത ഡോള്‍ഫസ്, ആന്റണിയുടെ സ്‌കൂട്ടറിന് പുറകിലിരുന്നു പോകുമ്പോള്‍ കുണ്ടറ പൊലിസ് സ്റ്റേഷനു സമീപം ഹെല്‍മറ്റില്ലെന്ന പേരില്‍ പൊലിസ് തടഞ്ഞ് നിറുത്തി. ഫൈന്‍ അടയ്ക്കാമെന്ന് പറഞ്ഞപ്പോള്‍ സ്‌കൂട്ടറില്‍ നിന്നിറങ്ങിയ ഡോള്‍ഫസിന്റെ കൈ വിറയ്ക്കുന്നത് കണ്ട് മദ്യപിച്ചിട്ടുണ്ടോ എന്ന് പരിശോധിക്കാന്‍ സ്റ്റേഷനിലേക്ക് പോകണമെന്ന് ആവശ്യപ്പെട്ടു. സജീവ രാഷ്ട്രീയ പ്രവര്‍ത്തകനായ താന്‍ ജീവിതത്തില്‍ ഒരിക്കല്‍ പോലും മദ്യപിച്ചിട്ടില്ലെന്ന് പറഞ്ഞപ്പോള്‍ വളരെ മോശമായിട്ടാണ് സബ് ഇന്‍സ്പക്ടര്‍ പ്രതികരിച്ചത്. ഇങ്ങനെയാണോ പൊലിസ് പെരുമാറേണ്ടതെന്ന് ചോദിച്ച ഡോള്‍ഫസ്, പൊതുജനങ്ങളോട് നന്നായി പെരുമാറണമെന്ന് പറഞ്ഞത് എസ്.ഐക്ക് ഇഷ്ടപ്പെട്ടില്ല. ശേഷം എസ്.ഐ ബലം പ്രയോഗിച്ച് ആന്റണിയെ സ്റ്റേഷനിലേക്ക് കൊണ്ടുപോയി. പരിശോധനയില്‍ ആന്റണി മദ്യപിച്ചിട്ടില്ലെന്ന് വ്യക്തമായി. ആന്റണിയെ കൊണ്ടുപോയതിനു പിറകേ പൊലിസ് സ്റ്റേഷനിലേക്ക് പോകാന്‍ ശ്രമിച്ച ഡോള്‍ഫസ് നടക്കാനാവാതെ വഴിയിലിരുന്നു. ബോധരഹിതനായിവീണ ഡോള്‍ഫസിനെ സമീപത്തെ സ്വകാര്യ ആശുപത്രിയില്‍ കൊണ്ടുപോയെങ്കിലും ഗുരുതരാവസ്ഥയിലായതിനാല്‍ അവിടെ നിന്ന് കൊല്ലത്തെ സ്വകാര്യ ആശുപത്രിയിലേക്ക് കൊണ്ടുപോയി. രാത്രി വൈകി ഡോള്‍ഫസ് മരണമടഞ്ഞു. കെ.എസ്.ഇ.ബിയില്‍ നിന്ന് വിരമിച്ച ഡോള്‍ഫസ് ഇലക്ട്രിസിറ്റി വര്‍ക്കേഴ്‌സ് ഫെഡറേഷന്റെ സജീവ പ്രവര്‍ത്തകനായിരുന്നു. സി.പി.ഐ കുണ്ടറ മണ്ഡലം സെക്രട്ടറിയേറ്റ് അംഗവും ക്ഷീരോല്‍പ്പാദക സഹകരണ സംഘം പ്രസിഡന്റുമായിരുന്നു.
ഡോള്‍ഫസിന്റെ മരണത്തില്‍ പ്രതിഷേധിച്ച് സി.പി.ഐ കുണ്ടറ മണ്ഡലം കമ്മിറ്റിയുടെ നേതൃത്വത്തില്‍ കുണ്ടറ പൊലിസ് സ്റ്റേഷനിലേക്ക് മാര്‍ച്ച് നടത്തി. പൊലിസ് അതിക്രമം മൂലമാണ് ഡോള്‍ഫസ് മരണമടഞ്ഞതെന്നും കുറ്റവാളികളായ പൊലിസുകാര്‍ ശിക്ഷിക്കപ്പെടുമെന്ന് ഉറപ്പു വരുത്തുമെന്നും ഡോള്‍ഫസിന്റെ കുടുംബാംഗങ്ങള്‍ പറഞ്ഞു. ഡോള്‍ഫസിന് ഒരു മകന്‍ മാത്രമേയുള്ളൂ.
കുണ്ടറ പൊലിസ് സ്റ്റേഷനില്‍ കസ്റ്റഡിയില്‍ ഒരു ദളിത് യുവാവ് മരണമടഞ്ഞിട്ട് ഒരു മാസം തികയുന്നതിനു മുമ്പാണ് പൊലിസ് അതിക്രമത്തില്‍ വീണ്ടും മരണമുണ്ടായത്. അന്നു പൊലിസ് സ്‌റ്റേഷനിലെത്തിയ ഡി.സി.സി പ്രസിഡന്റ് കൊടിക്കുന്നില്‍ സുരേഷ് എം.പിയോടും ധിക്കാരപരമായാണ് എസ്.ഐ പെരുമാറിയതെന്നു പരാതി ഉയര്‍ന്നിരുന്നു. അശ്ലീല ഫോണ്‍ വിളിയെക്കുറിച്ച് പരാതിപ്പെട്ട യുവതിയെയും ബന്ധുക്കളെയും ഡോള്‍ഫസിന്റെ മരണത്തിന് ഉത്തരവാദിയായ എസ്.ഐ അവഹേളിച്ചതായും വാര്‍ത്തയുണ്ടായിരുന്നു.
കുണ്ടറ പൊലിസ് സ്റ്റേഷനില്‍ നിന്ന് 5 കിലോമീറ്റര്‍ മാത്രം ദൂരെയുള്ള അഞ്ചാലുംമൂട് പൊലിസ്‌സ്റ്റേഷനില്‍ രണ്ട് ദലിത് യുവാക്കള്‍ 5 ദിവസം അന്യായതടങ്കലില്‍ ക്രൂരമായി പീഡിപ്പിക്കപ്പെട്ടതു കഴിഞ്ഞമാസമായിരുന്നു. കുണ്ടറ പൊലിസിനെതിരെ ഇടതുമുന്നണി നേതാക്കള്‍ക്കിടയിലും പ്രതിഷേധം ഉയര്‍ന്നിട്ടുണ്ട്.

സംഘാടനം പരാജയപ്പെട്ടതായി
വിദ്യാര്‍ഥികളും രക്ഷിതാക്കളും

നെയ്യാറ്റിന്‍കര: നെയ്യാറ്റിന്‍കര ഗേള്‍സ്, ബോയ്‌സ്, ടൗണ്‍ എല്‍.പി.എസ്, ജെ.ബി.എസ് എന്നിവിടങ്ങളില്‍ കഴിഞ്ഞ മൂന്ന് ദിവസമായി നടന്നു വന്ന റവന്യു ജില്ലാ ശാസ്ത്ര മേള ഇന്നലെ സമാപിച്ചു.
12 സബ് ജില്ലകളില്‍ നിന്നായി 6000 ല്‍ അധികം വിദ്യാര്‍ഥികളാണ് മത്സരത്തില്‍ പങ്കെടുത്തത്. മേളയുടെ സംഘാടനം പരാജയപ്പെട്ടതായി വിദ്യാര്‍ഥികളും രക്ഷിതാക്കളും ആരോപിച്ചു. സ്‌കൂളുകളില്‍ ആവശ്യത്തിന് ലൈറ്റുകളും ഫാനുകളും സജ്ജമാക്കാത്തതും വിധി നിര്‍ണയത്തിലുണ്ടായ അപാകതയും വിമര്‍ശനത്തിനിടയായി.
മേളയുടെ നടത്തിപ്പിനായി 14 സബ് കമ്മിറ്റികളെ നിയോഗിച്ചെങ്കിലും നോട്ടീസ് പോലും വിതരണം ചെയ്യാന്‍ കഴിയാത്തതില്‍ മേളയില്‍ പങ്കെടുക്കാനെത്തിയ വിദ്യാര്‍ഥികളും രക്ഷിതാക്കളും ഏറെ വലഞ്ഞു. കൂടാതെ മേളയുടെ മിക്ക പ്രദര്‍ശന മത്സരങ്ങള്‍ക്കും മേല്‍ നോട്ടം വഹിക്കാന്‍ അധ്യാപകരില്ലായിരുന്നത് ആക്ഷേപത്തിനിടയായി. ഇതിന് പുറമേ വിധി നിര്‍ണയത്തിലും ഫലം പ്രസിദ്ധീകരണത്തിലും അപാകതയുണ്ടായതായും പറയുന്നു. കൂടാതെ മത്സര ഫലങ്ങള്‍ മാധ്യമങ്ങള്‍ക്ക് നല്‍കാന്‍ അധികൃതര്‍ തയാറാകാത്തതില്‍ ദൂരൂഹതയുണ്ടെന്നും രക്ഷിതാക്കള്‍ ആരോപിച്ചു.
ശാസ്‌ത്രോത്സവം മത്സരഫലം:
എല്‍.പി.വിഭാഗം: കളക്ഷനുകള്‍, മോഡലുകള്‍ - വി.എം.അഭിനവ് , ഗവ.യു.പി.എസ് ആലന്തറ. ചാര്‍ട്ടുകള്‍ - ചൈത്ര ആര്‍.കൃഷ്ണ, ഗവ.യു.പി.എസ്, ആലന്തറ. സിംപിള്‍ എക്‌സ്‌പെരിമെന്റ്‌സ് - പി.എസ്.അരവിന്ദ് , സെന്റ് ജോണ്‍സ് എച്ച്.എസ്.എസ് ഉണ്ടന്‍കോട്.
യു.പി.വിഭാഗം: വര്‍ക്കിങ് മോഡല്‍ - ജെ.എസ്.അന്‍മില, സെന്റ് പീറ്റേഴ്‌സ് യു.പി.എസ് വ്‌ളാത്താന്‍കര. സ്റ്റില്‍ മോഡല്‍ - എ.എസ്.അഷ്ടമി, ഗവ.യു.പി.എസ്, വാമനപുരം. റിസര്‍ച്ച് ടൈപ്പ് പ്രോജക്ട് - കെ.ജെ.ജ്യോതിക, സെന്റ് ക്രി സോസ്റ്റംസ് ജി.എച്ച്.എസ്, നെല്ലിമൂട്. ഇംപ്രവൈസ്ഡ് എക്‌സ്‌പെരിമെന്റ്‌സ് - മീനാക്ഷി പി.നായര്‍, ഗവ.യു.പി.എസ് ആട്ടുകാല്‍. ടീച്ചിങ് എയ്ഡ് - ജെ.ലാല്‍കുമാര്‍,എല്‍.എം.എസ്. എച്ച്.എസ്.എസ്.അമരവിള.
എച്ച്.എസ്.വിഭാഗം: വര്‍ക്കിങ് മോഡല്‍ - സ്‌നിഗ്ധ ലിയോ, കാര്‍മല്‍ ഇ.എം.ഗേള്‍സ് എച്ച്.എസ്.എസ് വഴുതക്കാട്. സ്റ്റില്‍ മോഡല്‍ - എസ്.സന്ധ്യ, ന്യൂ എച്ച്.എസ്.എസ് നെല്ലിമൂട്. റിസര്‍ച്ച് ടൈപ്പ് പ്രോജക്ട് - ജെ.നൈല , കെ.ടി.സി.ടി.ഇ.എം.എച്ച്.എസ്.എസ്, കടുവയില്‍. ഇംപ്രവൈസ്ഡ് എക്‌സ് പെരിമെന്റ്‌സ് - എസ്.ശ്രാവണ്‍, എല്‍.വി.എച്ച്.എസ്, പോത്തന്‍കോട്. ടീച്ചിങ് എയ്ഡ് - ആര്‍.എസ്.അശോക്കുമാര്‍, എല്‍.വി.എച്ച്.എസ് പോത്തന്‍കോട്. ടീച്ചേഴ്‌സ് പ്രോജക്ട് - എസ്.ഷീബാ കൃഷ്ണന്‍ , ഗവ.വി.എച്ച്.എസ്.എസ്.പുവാര്‍. സയന്‍സ് ഡ്രാമ - അഗ്‌രാജ് പി.ദാസ്, ഗവ.വി.എച്ച്.എസ്.എസ് ഞെക്കാട്.
എച്ച്.എസ്.എസ് വി.എച്ച്.എസ്.എസ്: വര്‍ക്കിങ് മോഡല്‍ - ജി.ഓമല്‍ ശരത് , കെ.ടി.സി.ടി.ഇ.എം.എച്ച്.എസ്.എസ് കടുവയില്‍. സ്റ്റില്‍ മോഡല്‍ - യു.ബി.അഷ്ടമി , കെ.ടി.സി.ടി.ഇ.എം.എച്ച്.എസ്.എസ് കടുവയില്‍. റിസര്‍ച്ച് ടൈപ്പ് പ്രോജക്ട് - എ.അഭിരാം , കെ.ടി.സി.ടി.ഇ.എം. എച്ച്.എസ്.എസ് കടുവയില്‍. ഇംപ്രവൈസ്ഡ് എക്‌സ്‌പെരിമെന്റ്‌സ് - ശ്രീജിത്ത് സുരേന്ദ്രന്‍, കെ.ടി.സി.ടി.ഇ.എം.എച്ച്.എസ്.എസ് കടുവയില്‍. ടീച്ചേഴ്‌സ് പ്രോജക്ട് - ബി.ഷീജ , ഗവ.വി.എച്ച്.എസ്.എസ് ഞെക്കാട്. ഡിജിറ്റല്‍ പെയിന്റിങ് - ആര്‍.എസ്.പാര്‍വതി , ഗവ.എച്ച്.എസ്.എസ് നെയ്യാറ്റിന്‍കര.