മലപ്പുറം: കൊടിഞ്ഞിയില്‍ വെട്ടേറ്റുമരിച്ച യുവാവിന്റെ കൊലയാളികളെ കുറിച്ച് സൂചന ലഭിച്ചതായി പൊലിസ്. കൊടിഞ്ഞി പുല്ലാണി അനന്തകൃഷ്ണന്‍ നായരുടെ മകന്‍ അനില്‍കുമാര്‍ എന്ന ഫൈസലി(30)നെയാണ് ഫാറൂഖ് നഗര്‍ അങ്ങാടിക്കടുത്ത് റോഡരികില്‍ വെട്ടേറ്റ് ദാരുണമായി മരിച്ച നിലയില്‍ കണ്ടെത്തിയത്. ഇന്ന് പുലര്‍ച്ചെ അഞ്ചോടെയാണു മൃതദേഹം കാണപ്പെട്ടത്.

സംഭവസ്ഥലത്ത് തൃശൂര്‍ ഫോറന്‍സിക് ഡിപ്പാര്‍ട്ട്‌മെന്റില്‍ നിന്നുള്ള ഉദ്യോഗസ്ഥര്‍, വിരലടയാള വിദഗ്ധര്‍, ഡോഗ് സ്‌ക്വാഡ് എ.ഡി.ജി.പി സുദേവ് കുമാര്‍, എസ്.പി ദേബേഷ്‌കുമാര്‍ ബഹ്‌റ തുടങ്ങിയവര്‍ സന്ദര്‍ശിച്ചു തെളിവുകള്‍ ശേഖരിച്ചു. സംഭവം നടന്നതിന്റെ നൂറ് മീറ്റര്‍ അകലെയുള്ള തോട്ടത്തിലും രക്തത്തിന്റെ അംശം കണ്ടെത്തിയിട്ടുണ്ട്. പ്രദേശം മൊത്തം പൊലിസ് കാവലിലാണ്.