റിയാദ്: വിസാ ഫീസില്‍ വന്‍ വര്‍ധനവ് വരുത്തിയിട്ടും ഈ വര്‍ഷം ഉംറ തീര്‍ത്ഥാടകരുടെ എണ്ണത്തില്‍ ഇരട്ടിയിലധികം വര്‍ദ്ധനവുണ്ടായതായി അധികൃതര്‍ വ്യക്തമാക്കി. ആവര്‍ത്തിച്ച ഉംറക്കും ഹജ്ജിനും മറ്റു ഏതു വിസകളുടേതു പോലെ 2000 (36000 രൂപ) റിയാല്‍ അധികം ഏര്‍പ്പെടുത്തിയതിനാല്‍ ഈ വര്‍ഷം മുതല്‍ ഉംറ തീര്‍ത്ഥാടകരുടെ എണ്ണത്തില്‍ വന്‍ കുറവ് ഉണ്ടാവാന്‍ സാധ്യതയുണ്ടെന്ന ആശങ്കകള്‍ക്കിടയിലാണ് കഴിഞ്ഞ വര്‍ഷം ഇതേ കാലയളവിനേക്കാള്‍ 100 ശതമാനം വര്‍ധനവ് രേഖപ്പെടുത്തിയത്. ഈ വര്‍ഷം ഉംറ സീസണ്‍ തുടങ്ങിയതു മുതല്‍ കഴിഞ്ഞ ബുധനാഴ്ച വരെയുള്ള ചുരുങ്ങിയ കാലയളവില്‍ കണക്കു പ്രകാരം 1,02,480 തീര്‍ത്ഥാടകര്‍ ഉംറ നിര്‍വഹിക്കാന്‍ വിശുദ്ധ മക്കയിലെത്തി. കഴിഞ്ഞ വര്‍ഷം ഇതേ കാലയളവില്‍ 45634 തീര്‍ത്ഥാടകരാണ് ഉറക്കെത്തിയിരുന്നത്.

ഈ വര്‍ഷം ഇതുവരെ കാലയളവില്‍ 339702 ഉംറ വിസകളാണ് നല്‍കിയത്. 8504 തീര്‍ത്ഥാടകര്‍ ഉംറ കഴിഞ്ഞു സ്വദേശത്തേക്ക് തിരിച്ചു പോയി. 93976 തീര്‍ത്ഥാടകര്‍ ഇപ്പോള്‍ പുണ്യ ഭൂമിയിലുണ്ട്. ഈ കാലയളവില്‍ എല്ലാവരും തന്നെ കാലാവധി കഴിയുന്നതിനു മുന്‍പ് തന്നെ തിരിച്ചു പോകുകയും ചെയ്തിട്ടുണ്ട്.

മുന്‍ വര്‍ഷങ്ങളെ അപേക്ഷിച്ച് ഈ വര്‍ഷം വളരെ നേരത്തെ തന്നെ ഉംറ സീസന്‍ ആരംഭിച്ചിരുന്നു. റബീഉല്‍ അവ്വല്‍ മാസം പിറക്കുന്നതോടെ തീര്‍ത്ഥാടകരുടെ ഒഴുക്ക് വര്‍ധിക്കും. വരുന്ന ഏതാനും മാസങ്ങളില്‍ രാജ്യത്ത് കടുത്ത തണുപ്പ് അനുഭവപ്പെടുന്നതു തീര്‍ത്ഥാടകര്‍ക്ക് ഏറെ ബുദ്ധിമുട്ടനുഭവപ്പെടും. തുടക്കത്തില്‍ തന്നെ ഉംറ തീര്‍ത്ഥാടകരുടെ എണ്ണത്തില്‍ ഗണ്യമായ വര്‍ധനവ് രേഖപ്പെടുത്തിയത് ഉംറ മേഖലക്ക് ഉണര്‍വ്വ് പകരും. അതിനിടെ സ്വദേശികളും വിദേശികളുമായ കുടുംബങ്ങളില്‍ നിന്നും ഉംറ നിര്‍വഹിച്ചവരുടെ കണക്കെടുക്കാന്‍ അധികൃതര്‍ തീരുമാനിച്ചു.

ഇതാദ്യമായാണ് ആഭ്യന്തര ഉംറ തീര്‍ത്ഥാടകരുടെ കണക്കെടുക്കുന്നത്. കൂടുതല്‍ സൗകര്യം ഏര്‍പ്പെടുത്തുന്നതിനാണ് ഇതെന്നാണ് കരുതുന്നത്. 2020 ഓടെ വിദേശ ഉംറ തീര്‍ത്ഥാടകരുടെ എണ്ണം ഒന്നര കോടിയായും 2030 ഓടെ മൂന്നു കോടിയായും ഉയര്‍ത്താനാണ് പദ്ധതി. കഴിഞ്ഞ വര്‍ഷം 62 ലക്ഷത്തോളം തീര്‍ത്ഥാടകരാണ് വിദേശ രാജ്യങ്ങളില്‍ നിന്നെത്തിയത്.