കൊല്ലം: റവന്യൂജില്ലാ കായികമേള നാളെ മുതല്‍ 25 വരെ ലാല്‍ബഹദൂര്‍ സ്റ്റേഡിയത്തില്‍ നടക്കും. കായിക മേളയ്ക്കുള്ള ഒരുക്കങ്ങള്‍ പൂര്‍ത്തിയായതായി സംഘാടകര്‍ അറിയിച്ചു. 12 ഉപജില്ലകളില്‍ നിന്നും 149 ഇനങ്ങളിലേക്ക് 3400 കായിക താരങ്ങളും 100 ഒഫിഷ്യല്‍സും മേളയില്‍ പങ്കെടുക്കും. സബ്ജൂനിയര്‍, ജൂനിയര്‍, സീനിയര്‍ വിഭാഗങ്ങളിലായി ആണ്‍കുട്ടികള്‍ക്കും പെണ്‍കുട്ടികള്‍ക്കും പ്രത്യേകം മത്സരങ്ങളാണ് നടക്കുന്നത്.
മേളയില്‍ ഒന്ന്, രണ്ട്, മൂന്ന് സ്ഥാനങ്ങള്‍ നേടുന്ന താരങ്ങള്‍ അടുത്ത മാസം മലപ്പുറത്ത് നടക്കുന്ന സംസ്ഥാന സ്‌കൂള്‍ കായിക മേളയില്‍ പങ്കെടുക്കാന്‍ യോഗ്യത നേടും. മേളയുടെ അവസാന ദിവസം അധ്യാപകര്‍ക്കായുള്ള കായിക മത്സരം നടക്കും.
നാളെ രാവിലെ 9.30ന് നൗഷാദ് എം.എല്‍.എ ഉദ്ഘാടനം നിര്‍വഹിക്കും. ഡപ്യൂട്ടിമേയര്‍ വിജയാഫ്രാന്‍സിസി അധ്യക്ഷയാകും. വിദ്യാഭ്യാസ ഡെപ്യൂട്ടി ഡയറക്ടര്‍ കെ. ശ്രീകല സ്വാഗതം പറയും. കോര്‍പറേഷന്‍ സ്റ്റാന്റിങ് കമ്മിറ്റി ചെയര്‍മാന്‍ ടി.ആര്‍.സന്തോഷ്‌കുമാര്‍, കൗണ്‍സിലര്‍ റീനാ സെബാസ്റ്റ്യന്‍, വി.എച്ച്.എസ്.ഇ അസി.ഡയറക്ടര്‍ എസ്.ഷീബ, കൊല്ലം സ്‌പോര്‍ട്‌സ് കൗണ്‍സില്‍ പ്രസിഡന്റ് എം.സുന്ദരേശന്‍പിള്ള എന്നിവര്‍ സംസാരിക്കും.
25ന് നടക്കുന്ന സമാപന സമ്മേളനം എം. മുകേഷ് എം.എല്‍.എ ഉദ്ഘാടനം ചെയ്യും. മേയര്‍. വി.രാജേന്ദ്രബാബു അധ്യക്ഷനാകും. മേളയുടെ നടത്തിപ്പിനായി മേയര്‍. വി.രാജേന്ദ്രബാബു ചെയര്‍മാനായും വിദ്യാഭ്യാസ ഡപ്യൂട്ടി ഡയറക്ടര്‍ എസ്. ശ്രീകല ജനറല്‍ കണ്‍വീനറായും സംഘാടക സമിതി രൂപികരിച്ചു. വാര്‍ത്താസമ്മേളനത്തില്‍ കെ.എസ്. ശ്രീകല, പി.ആര്‍.സജീവ്കുമാര്‍,ഷാനവാസ്, വര്‍ഗീസ് വൈദ്യന്‍ എന്നിവര്‍ പങ്കെടുത്തു.