പെണ്‍കുട്ടിയെ നടുറോഡില്‍ പീഡിപ്പിക്കാന്‍ ശ്രമിച്ച മദ്യപസംഘത്തെ റിമാന്‍ഡ് ചെയ്തു
കൊല്ലം: വീടുകള്‍തോറും വസ്ത്രവില്‍പ്പന നടത്തുന്ന പെണ്‍കുട്ടിയെ പീഡിപ്പിക്കാന്‍ ശ്രമിച്ച മദ്യപസംഘം പൊലിസ് പിടിയിലായെങ്കിലും ഇത്തരം സംഘങ്ങള്‍ നാട്ടുകാര്‍ക്കു പേടിസ്വപ്നമാവുകയാണ്.
ഓര്‍ക്കാപ്പുറത്തു യുവാക്കള്‍ കയറിപ്പിടിച്ചതിനെ തുടര്‍ന്നു പിന്നോട്ടുവീണ പെണ്‍കുട്ടിയുടെ വസ്ത്രങ്ങള്‍ പ്രതികള്‍ വലിച്ചുകീറി. രക്ഷപ്പെട്ടോടിയ പെണ്‍കുട്ടിയെ പിന്തുടര്‍ന്നുവന്ന് ബൈക്ക് കൊണ്ടു ഇടിച്ചു വീഴ്ത്തുകയും ശരീരത്തിലൂടെ ഓടിച്ചുകയറ്റാന്‍ ശ്രമിക്കുകയും ചെയ്തു.
ഇരവിപുരം പൊലിസിന്റെ പിടിയിലായ പറയത്തുമുക്കു തൊടിയില്‍വീട്ടില്‍ നിസാര്‍(40), പറയത്തുമുക്ക് മംഗരത്തുവിള വീട്ടില്‍ ബിനു(31)എന്നിവരെ കോടതി റിമാന്റു ചെയ്തു.
രണ്ടുദിവസം മുമ്പായിരുന്നു സംഭവം നടന്നത്. വീട്ടിലെ സാമ്പത്തിക പരാധീനതകള്‍ കാരണം ജോലിക്കിറങ്ങിയതായിരുന്നു പെണ്‍കുട്ടി. വീടുകള്‍ തോറും കയറിയിറങ്ങി വീട്ടുസാധനങ്ങള്‍ വില്‍ക്കുന്ന ജോലിയാണ് ലഭിച്ചത്. സാധനങ്ങള്‍ വില്‍ക്കുന്ന വഴിയില്‍ മദ്യപിച്ചുകൊണ്ടിരുന്ന പ്രതികള്‍ പെണ്‍കുട്ടിയോട് വില്‍ക്കുന്ന സാധനങ്ങള്‍ കാണിക്കാന്‍ ആവശ്യപ്പെട്ടു. സാധനങ്ങള്‍ എടുത്തു കാണിച്ചകൊണ്ടിരുന്ന പെണ്‍കുട്ടിയെ പ്രതികള്‍ പിറകിലൂടെ കയറിപ്പിടിച്ചു. പേടിച്ചു പിന്നോട്ടുവീണ പെണ്‍കുട്ടിയുടെ വസ്ത്രങ്ങള്‍ വലിച്ചു കീറി പീഡിപ്പിക്കാന്‍ ശ്രമിക്കുകയായിരുന്നു. രക്ഷപ്പെട്ടോടിയ പെണ്‍കുട്ടിയെ ബൈക്കില്‍ പിന്തുടര്‍ന്ന്് ഇടിച്ചു വീഴ്ത്തി ദേഹത്തൂടെ ബൈക്കോടിച്ചു കയറ്റാന്‍ ശ്രമിക്കുകയും ചെയ്തു.
ബഹളംകേട്ടെത്തിയ പ്രദേശവാസികളാണ് പെണ്‍കുട്ടിയെ രക്ഷപെടുത്തി ആശുപത്രിയില്‍ എത്തിച്ചത്. ഇരവിപുരം സി.ഐ പങ്കജാക്ഷന്റെ നിര്‍ദേശപ്രകാരം ഇരവിപുരം എസ്.ഐ ഗോപി, അഡീഷണല്‍ എസ്.ഐ മാരായ ഷിബിന്‍, ജ്യോതിഷ്, എ. എസ്.ഐ മാരായ ജോയ് ആല്‍ബര്‍ട്ട്, റോജി എന്നിവര്‍ ചേര്‍ന്നാണ് പ്രതികളെ അറസ്റ്റ് ചെയ്തത്.