കോഴിക്കോട്: പട്ടിക ജാതി വര്‍ഗ വകുപ്പിന്റെ ആഭിമുഖ്യത്തില്‍ എസ്.എസ്.എല്‍.സി, പ്ലസ്ടു പരീക്ഷകളില്‍ മുഴുവന്‍ വിഷയങ്ങളിലും എ പ്ലസ് നേടിയ പട്ടികജാതി വിഭാഗക്കാരായ വിദ്യാര്‍ഥികള്‍ക്കു സ്വര്‍ണമെഡല്‍ സമ്മാനിച്ചു. കോഴിക്കോട്, വയനാട്, കാസര്‍ക്കോട്, കണ്ണൂര്‍ ജില്ലകളിലെ വിദ്യാര്‍ഥികള്‍ക്കാണു മെഡല്‍ സമ്മാനിച്ചത്. 136 എസ്.എസ്.എല്‍.സി വിദ്യാര്‍ഥികളും 21 പ്ലസ്ടു വിദ്യാര്‍ഥികളും മെഡല്‍ ഏറ്റുവാങ്ങി. ന്യൂ നളന്ദ ഓഡിറ്റോറിയത്തില്‍ നടന്ന ചടങ്ങ് മേയര്‍ തോട്ടത്തില്‍ രവീന്ദ്രന്‍ ഉദ്ഘാടനം ചെയ്തു. ജില്ലാ പഞ്ചായത്ത് പ്രസിഡന്റ് ബാബു പറശേരി അധ്യക്ഷനായി. ജോയിന്റ് ഡയറക്ടര്‍ വിദ്യാഭ്യാസം വി.എസ് മുഹമ്മദ് ഇബ്രാഹിം, എസ്.എന്‍ നന്ദകുമാര്‍, ഗുരുപ്രസാദ്, കെ.ജി വിജയപ്രസാദ്, എം.എന്‍ അനന്തന്‍, എ.കെ രഘുനാഥ് എന്നിവര്‍ സംസാരിച്ചു.