കണ്ണൂര്‍: കേരളത്തിലെ മുഴുവന്‍ സര്‍ക്കാര്‍-എയ്ഡഡ് ഹൈസ്‌കൂള്‍ ഹയര്‍ സെക്കന്‍ഡറി-വൊക്കേഷണല്‍ ഹയര്‍ സെക്കന്‍ഡറി ക്ലാസ് മുറികളും ഐ.ടി ലാബുകളും ഹൈടെക് ആക്കാനുളള പ്രവര്‍ത്തനങ്ങള്‍ നടന്നു വരികയാണെന്ന് ഐ.ടി അറ്റ് സ്‌കൂള്‍ എക്‌സി. ഡയരക്ടര്‍ കെ അന്‍വര്‍ സാദത്ത്. ഹൈടെക് ആക്കുന്നതിനു മുന്നോടിയായി ഓണ്‍ലൈന്‍ സര്‍വെയില്‍ വിവരങ്ങള്‍ നല്‍കുന്നതിനായി ജില്ലയിലെ വിവിധ കേന്ദ്രങ്ങളില്‍ സംഘടിപ്പിച്ച സ്‌കൂള്‍ ഐ.ടി കോഓര്‍ഡിനേറ്റര്‍മാരുടെ ശില്‍പശാലയില്‍ വീഡിയോ പ്രഭാഷണം നടത്തുകയായിരുന്നു അദ്ദേഹം.
ഐ.ടി അറ്റ് സ്‌കൂളിന്റെ നേതൃത്വത്തില്‍ കംപ്യൂട്ടര്‍ ലാബ്, ബ്രോഡ് ബാന്റ് ഇന്റര്‍നെറ്റ്, ക്ലാസ് മുറികളില്‍ ലാപ്‌ടോപ്-പ്രൊജക്ടര്‍-ശബ്ദസംവിധാനം, നെറ്റ്‌വര്‍ക്കിങ്ങ് എന്നിവ ഏര്‍പ്പെടുത്തും. ഇതിനു സജ്ജമാകുന്ന വിധം ക്ലാസ് മുറികളും ലാബും സുരക്ഷിതമാക്കല്‍, പെയിന്റിങ്, പൊടിശല്യമില്ലാത്ത ക്ലാസ് മുറികള്‍, സുരക്ഷിതമായ വൈദ്യുതീകരണം, മേല്‍ക്കൂരകള്‍ എന്നിവ അതത് സ്‌കൂളുകള്‍ പൂര്‍ത്തിയാക്കണം. മുഴുവന്‍ അധ്യാപകര്‍ക്കും കംപ്യൂട്ടര്‍ പരിശീലനം, എല്ലാ വിഷയങ്ങളും ഐ.സി.ടി ഉപയോഗിച്ച് പഠിപ്പിക്കാനുള്ള പരിശീലനം തുടങ്ങിയ അക്കാദമിക് പ്രവര്‍ത്തനങ്ങളും നടപ്പാക്കും. ഡിസംബര്‍ 5നു മുമ്പ് സ്‌കൂളുകള്‍ ഓണ്‍ലൈന്‍ വിവരങ്ങള്‍ നല്‍കണം. ആദ്യം സജ്ജമാകുന്ന സ്‌കൂളുകളുടെ ക്ലാസ്മുറികള്‍ ആദ്യഘട്ടത്തില്‍ പരിഗണിക്കും. ജില്ലാതല ശില്‍പശാലകള്‍ ജില്ലാ റിസോഴ്‌സ് സെന്റര്‍, ഐ.ടി അറ്റ് സ്‌കൂള്‍ കണ്ണൂര്‍, ബി.ഇ.എം.പി.എച്ച്.എസ് തലശ്ശേരി, സീതി സാഹിബ് എച്ച്.എസ്.എസ് തളിപ്പറമ്പ് തുടങ്ങിയ കേന്ദ്രങ്ങളിലായാണ് നടന്നത്.