പാലാ: മലേഷ്യയില്‍ നടക്കുന്ന 30ാമത് ഇന്റര്‍നാഷനല്‍ മാസ്റ്റേഴ്‌സ് അത്‌ലറ്റിക് മീറ്റില്‍ പങ്കെടുക്കുന്നതിനായി കോട്ടയം ജില്ലാ പൊലിസിന്റെ മൂവര്‍സംഘം ഇന്ന് യാത്ര തിരിക്കും.
ഈ മാസം 26 മുതല്‍ ക്വാലാലംപൂരിലാണ് മീറ്റ് നടക്കുന്നത്. സാബു എം.ജി മാളിയേക്കല്‍ (ട്രാഫിക്, പാലാ), ബിനോയി തോമസ് ഇടയ്ക്കാട്ടുകുന്നേല്‍ (പാലാ പൊലിസ് സ്റ്റേഷന്‍), സജി ജോര്‍ജ് പുറപ്പുഴയില്‍ (നാര്‍ക്കോട്ടിക് സെല്‍) എന്നിവരാണ് മീറ്റില്‍ ഇന്ത്യയെ പ്രതിനിധീകരിച്ച് പങ്കെടുക്കുന്നത്.
കഴിഞ്ഞ സംസ്ഥാന പൊലിസ് മീറ്റുകളിലും മാസ്റ്റേഴ്‌സ് മീറ്റുകളിലും നിരവധി തവണ മെഡല്‍ കരസ്ഥമാക്കിയ ഇവര്‍ പാലാ സ്വദേശികളാണ്. പാലാ ഡിവൈ.എസ്.പി. വി.ജി. വിനോദ്കുമാറിന്റെ അകമഴിഞ്ഞ പിന്തുണയാണ് ഇവര്‍ക്ക് പരിശീലനത്തിന് അവസരമൊരുക്കിയത്.
സ്‌കൂള്‍ കാലഘട്ടം മുതല്‍ തങ്ങളെ പരിശീലിപ്പിച്ച വി.സി. ജോസഫിന്റെ ശിക്ഷണത്തിലാണ് പരിശീലനം നടത്തിവരുന്നത്. കഴിഞ്ഞ വര്‍ഷം ശ്രീലങ്കയില്‍ വച്ച് നടന്ന ഏഷ്യന്‍ മാസ്റ്റേഴ്‌സ് മീറ്റിലും മെഡല്‍ ജേതാക്കളാണ്.