റിയാദ്: അന്താരാഷ്ട്രതലത്തിലെ സാമ്പത്തിക ക്രയവിക്രയത്തില്‍ ഇന്ത്യന്‍ രൂപ കൂപ്പുകുത്തുന്നതോടെ ഗള്‍ഫ് കറന്‍സിയുമായുള്ള വിനിമയനിരക്കില്‍ റെക്കോര്‍ഡ് വര്‍ധന.
 മലയാളികളടക്കം ലക്ഷക്കണക്കിന് പ്രവാസികളുടെ ആശാകേന്ദ്രങ്ങളായ ഗള്‍ഫ് രാജ്യങ്ങളിലെ പ്രവാസികള്‍ക്ക് ജോലി ആശങ്കയ്ക്കിടയില്‍ ഇത് തെല്ലൊരാശ്വാസമാണ് നല്‍കുന്നത്. സഊദി, ഖത്തര്‍, ഒമാന്‍ റിയാലുകളും യു.എ.ഇ ദിര്‍ഹം, ബഹ്‌റിന്‍, കുവൈത്ത് ദിനാറുമെല്ലാം ഉയര്‍ന്ന നിരക്കിലാണ്.
സഊദി റിയാല്‍ 18.33രൂപയ്ക്കാണ് വിപണനം നടക്കുന്നത്. ഒന്‍പതു മാസത്തെ ഏറ്റവും ഉയര്‍ന്ന നിരക്കാണിത്.
മൂന്നു വര്‍ഷത്തെ ഏറ്റവും ഉയര്‍ന്ന നിരക്കായ 18. 73 രൂപയാണ്  ഖത്തര്‍ റിയാലിന് ലഭിച്ചത്. എട്ടുമാസത്തെ ഉയര്‍ന്ന നിരക്കില്‍ 18.73 ദിര്‍ഹത്തിലാണ് യു.എ.ഇയുടെ നില. കുവൈത്ത് ദിനാറിന് 224.25 രൂപയാണ് ലഭിച്ചത്. ആറുമാസത്തിനിടയിലെ ഏറ്റവും ഉയര്‍ന്ന നിരക്കാണിത്.
അതേസമയം നാട്ടിലെ പ്രതിസന്ധി മൂലം പണമയക്കുന്നതില്‍ പ്രവാസികള്‍ അല്‍പം ശങ്കിച്ച് നില്‍കുകയാണ്.
പെട്ടെന്നുള്ള ആവശ്യത്തിന് പണമയക്കുന്നവരാണ് കൂടുതല്‍ പ്രതിസന്ധിയിലുള്ളതെന്ന് മണിഎക്‌സ്‌ചേഞ്ച് ഓഫിസുകളില്‍ നിന്നുള്ള റിപ്പോര്‍ട്ടുകള്‍ സൂചിപ്പിക്കുന്നു. നാട്ടിലെ പണപ്രതിസന്ധിതന്നെയാണ് നാട്ടിലേക്ക് പണയമക്കുന്നതില്‍ നിന്നു പ്രവാസികളെ പിന്നോട്ട് വലിയ്ക്കുന്നത്.
നിരക്ക് ഉയരുമ്പോള്‍ സാധാരണയുണ്ടാകാറുള്ള പണമൊഴുക്കൊന്നും ഇല്ലെന്ന് പണമിടപാട് സ്ഥാപനങ്ങള്‍ വ്യക്തമാക്കുന്നുണ്ട്. എന്നാല്‍ നാട്ടിലെ ബാങ്ക് അക്കൗണ്ടിലേക്ക് പണമയക്കുന്ന രീതിയില്‍ വര്‍ധനയുണ്ടായിട്ടുണ്ട്.