ഇസ്ലാമാബാദ്: ഇന്ത്യയ്‌ക്കെതിരെ പാകിസ്താന്‍ ഒരു മിന്നലാക്രമണം നടത്തിയാല്‍ തലമുറകളോളം ഇന്ത്യയ്ക്ക് അത് മറക്കാന്‍ സാധിക്കില്ലെന്ന് പാക് സൈനിക മേധാവി ജനറല്‍ റഹീല്‍ ഷെരീഫ്. ഇന്ത്യന്‍ സൈന്യം നടത്തുന്ന ഏത് ആക്രമണത്തെയും തടുക്കാനും പ്രത്യാക്രമണം നടത്താനും പാക് സൈന്യം സുസജ്ജമാണെന്നും അദ്ദേഹം വ്യക്തമാക്കി.

എന്താണ് മിന്നലാക്രമണം എന്ന് ഇന്ത്യന്‍ സ്‌കൂളില്‍ കുട്ടികളെ പഠിപ്പിക്കുന്നതിന് സിലബസുകളില്‍ ഉള്‍പ്പെടുത്താന്‍ പോന്ന ഒന്നായിരിക്കും അതെന്നും അദ്ദേഹം പറഞ്ഞു. പദവിയില്‍ നിന്നും വിരമിക്കാന്‍ ഏതാനും ദിവസങ്ങള്‍ മാത്രം ബാക്കി നില്‍ക്കെയാ്ണ് ജനറല്‍ റഹീല്‍ ഷെരീഫിന്റെ പരാമര്‍ശം.

അതേസമയം അതിര്‍ത്തി കടന്ന് ഇന്ത്യ മിന്നലാക്രമണം നടത്തിയെന്ന വാര്‍ത്തകള്‍ അദ്ദേഹം വീണ്ടും തള്ളി. ഖൈബറിലെ ഗോത്രമേഖലയില്‍ മുന്‍ പാക്ക് താരം ഷാഹിദ് അഫ്രീദിയുടെ പേരിലുള്ള ക്രിക്കറ്റ് സ്റ്റേഡിയം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. നവംബര്‍ 29 നാണ് ജനറല്‍ റഹീല്‍ ഷെരീഫ് വിരമിക്കുന്നത്.