കണ്ണൂര്‍: സ്‌റ്റേറ്റ് എംപ്ലോയിസ് യൂനിയന്‍ (എസ്.ഇ.യു) സംസ്ഥാന സമ്മേളനത്തിനു ഇന്നു കണ്ണൂരില്‍ തുടക്കമാവും. മൂന്നൂദിവസങ്ങളിലായി നടക്കുന്ന സമ്മേളനത്തില്‍ 1200ഓളം പ്രതിനിധികള്‍ പങ്കെടുക്കും. ഇന്ന് ഉച്ചയ്ക്ക് 2.30ന് സംസ്ഥാന പ്രസിഡന്റ് നസീം ഹരിപ്പാട് നവനീതം ഓഡിറ്റോറിയത്തില്‍ പതാക ഉയര്‍ത്തും. തലമുറ സംഗമം എസ്.ഇ.യു സ്ഥാപക പ്രസിഡന്റ് എം.സി വടകര ഉദ്ഘാടനം ചെയ്യും. മുസ്‌ലിംലീഗ് സംസ്ഥാന വൈസ് പ്രസിഡന്റ് വി.കെ അബ്ദുല്‍ ഖാദര്‍ മൗലവി ഉപഹാരം നല്‍കും. വൈകുന്നേരം നാലിന് ചേംബര്‍ ഹാളില്‍ 'കേരളം 60 പ്രതീക്ഷയും യാഥാര്‍ഥ്യവും' സെമിനാര്‍ പ്രതിപക്ഷനേതാവ് രമേശ് ചെന്നിത്തല ഉദ്ഘാടനം ചെയ്യും. സര്‍വകലാശാലാ വൈസ് ചാന്‍സലര്‍ ഡോ. എം.കെ അബ്ദുല്‍ ഖാദര്‍, എം.ജി സര്‍വകലാശാലാ പ്രോ-വൈസ് ചാന്‍സലര്‍ ഡോ. ഷീന ഷുക്കൂര്‍ പങ്കെടുക്കും. നാളെ രാവിലെ 10ന് പാണക്കാട് ഹൈദരലി ശിഹാബ് തങ്ങള്‍ സമ്മേളനം ഉദ്ഘാടനം ചെയ്യും. പ്രതിപക്ഷ ഉപനേതാവ് പി.കെ കുഞ്ഞാലിക്കുട്ടി മുഖ്യപ്രഭാഷണം നടത്തും.