കണ്ണൂര്‍: മാവോവാദി വേട്ടയുടെ മറവില്‍ ജില്ലയിലെ മനുഷ്യാവകാശ, പരിസ്ഥിതി പ്രവര്‍ത്തകരുടെ മേല്‍ പൊലിസ് രഹസ്യനിരീക്ഷണം ശക്തമാക്കി. എല്‍.ഡി.എഫ് സര്‍ക്കാര്‍ അധികാരത്തില്‍ വന്നതുമുതല്‍ രഹസ്യാന്വേഷണ വിഭാഗം പൊതുവിഷയങ്ങളില്‍ ഇടപെടുന്ന മനുഷ്യാവകാശ, പരിസ്ഥിതി പ്രവര്‍ത്തകരുടെ മേല്‍ നിരീക്ഷണവുമായി രംഗത്തുണ്ട്.
ഡോ. ഡി സുരേന്ദ്രനാഥടക്കമുള്ള മനുഷ്യാവകാശ പ്രവര്‍ത്തനത്തില്‍ ഏര്‍പ്പെടുന്നവരെ നിരന്തരം നിരീക്ഷിച്ചു വരികയാണ്. മാസങ്ങള്‍ക്കു മുന്‍പ് പരിസ്ഥിതി പ്രവര്‍ത്തകനായ ഹരി ചക്കരക്കല്ലിന്റെ വീട്ടില്‍ രാത്രിയില്‍ കയറി റെയ്ഡുനടത്തുകയും ചെയ്തു. എന്നാല്‍ ഇവര്‍ക്കൊന്നും മാവോവാദി ബന്ധം തെളിയിക്കാന്‍ ഇതുവരെയായിട്ടില്ല. ജില്ലയില്‍ പ്രകൃതി ചൂഷണം, പരിയാരം മെഡിക്കല്‍ കോളജ് വിഷയം എന്നിങ്ങനെ വിവിധ വിഷയങ്ങളില്‍ സക്രിയമായി ഇടപെടുന്ന പരിസ്ഥിതി പ്രവര്‍ത്തനങ്ങളുടെ മുനയൊടിക്കുന്നതിനാണ് പൊലിസ് നടപടിയെന്നാണ് മനുഷ്യാവകാശ, പരിസ്ഥിതി പ്രവര്‍ത്തകരുടെ ആരോപണം. ഇവരെ കൂടാതെ ചില ഇസ്‌ലാമിക സംഘടനാ പ്രവര്‍ത്തകര്‍, സാംസ്‌കാരിക പ്രവര്‍ത്തകര്‍, എന്നിവരും രഹസ്യാന്വേഷണ നിരീക്ഷണത്തിലാണ്.

നിലമ്പൂര്‍ സംഭവത്തില്‍ ജുഡീഷ്യല്‍ അന്വേഷണം വേണം: എന്‍ വേണു

കണ്ണൂര്‍: ഏതെങ്കിലും രാഷ്ട്രീയ പാര്‍ട്ടിയില്‍ അംഗമായതുകൊണ്ടു മാത്രം ഏതൊരാളെയും വെടിവച്ചു കൊല്ലാനുള്ള അധികാരം പൊലിസിനില്ലെന്നും നിലമ്പൂരില്‍ രണ്ടുപേര്‍ വെടിയേറ്റു മരിച്ച സംഭവത്തില്‍ ജുഡീഷ്യല്‍ അന്വേഷണം വേണമെന്നും ആര്‍.എം. പി സംസ്ഥാന സെക്രട്ടറി എന്‍ വേണു. കൂത്തുപറമ്പ് രക്തസാക്ഷി ദിനത്തിന്റെ ഭാഗമായി ആര്‍.എം.പി ജില്ലാ കമ്മിറ്റിയുടെ നേതൃത്വത്തില്‍ സ്റ്റേഡിയം കോര്‍ണറില്‍ സംഘടിപ്പിച്ച ജനകീയ കൂട്ടായ്മ ഉദ്ഘാടനം ചെയ്യുകയായിരുന്നു അദ്ദേഹം. തിങ്കളാഴ്ച കേരളത്തില്‍ നടത്താനിരിക്കുന്ന ഹര്‍ത്താല്‍ ജങ്ങള്‍ക്ക് ഇരട്ടി ദ്രോഹമുണ്ടാക്കുമെന്നും കേന്ദ്ര-സംസ്ഥാന സര്‍ക്കാരുകളുടെ വൈരാഗ്യത്തില്‍ ജനങ്ങള്‍ പൊറുതിമുട്ടുകയാണെന്നും അദ്ദേഹം പറഞ്ഞു. ജില്ലാ സെക്രട്ടറി പി.പി മോഹനന്‍ അധ്യക്ഷനായി. കെ.കെ രമ, പോള്‍ ടി സാമുവല്‍, അഡ്വ. കസ്തൂരി ദേവന്‍, കെ.കെ കുഞ്ഞിക്കണ്ണന്‍, അപ്പുക്കുട്ടന്‍ കാരയില്‍ സംസാരിച്ചു.