ഷൊര്‍ണൂര്‍: പുത്തന്‍ കണ്ടുപിടുത്തങ്ങളും ആശയങ്ങളും കൂട്ടിയിണക്കി നിളാതീരത്തെ വിസ്മയിപ്പിച്ച സംസ്ഥാന സ്‌കൂള്‍ ശാസ്ത്രമേളയ്ക്ക് ഇന്ന് കൊടിയിറങ്ങും. ഇക്കഴിഞ്ഞ 23 ന് ഷൊര്‍ണൂരിന്റെ മണ്ണില്‍ തുടങ്ങിയ ശാസ്ത്രലോകമാണ് മികവും ഭാവനയും വിരിയിച്ച് ഇന്ന് സമാപിക്കുന്നത്. അഞ്ചുവേദികളിലായി ആറായിരത്തോളം പ്രതിഭകളാണ് ഇക്കഴിഞ്ഞ ദിവസങ്ങളില്‍ മത്സരിച്ചത്. ഇവരുടെ വിസ്മയലോകത്തെ അംഗീകരിക്കാനും മാര്‍ക്കു നല്‍കാനമായി 350 വിധികര്‍ത്താക്കളാണ് ഉണ്ടായിരുന്നത്.യു.പി. മുതല്‍ എച്ച്. എസ്.എസ് വരെയുള്ള വിദ്യാര്‍ഥികളും തങ്ങളുടെ കണ്ടുപിടുത്തങ്ങളും ആവിഷ്‌കാരങ്ങളുമായി ഷൊര്‍ണൂരില്‍ പുതുലോകം തീര്‍ക്കുകയായിരുന്നു. ഇതിനു പുറമെ ടീച്ചിംഗ് എയിഡ് വിഭാഗത്തില്‍ അധ്യാപകരുടെ മത്സരവും നടന്നിരുന്നു.
ചോക്ക് നിര്‍മാണം മുതല്‍ ബാഗും കുടയും കളിക്കോപ്പുകളും പാവകളും നിത്യജവിതത്തിലുപയോഗിക്കാവുന്ന യന്ത്രങ്ങള്‍വരെ കുട്ടികളുടെ കണ്ടുപിടുത്തങ്ങളില്‍ നിറഞ്ഞു. ജ്യാമിതീയ രൂപങ്ങളില്‍പോലും പുതിയ ആശയങ്ങളും സ്റ്റില്‍മോഡലുകളും പ്രദര്‍ശിപ്പിച്ചു.കെവിആര്‍ സ്‌കൂളായിരുന്നു പ്രധാന വേദി. സമൂഹത്തിന്റെ എല്ലാ മേഖലയിലുമുള്ള വിദ്യാര്‍ഥികളും ശ്ാസ്ത്രമേളയുടെ ഭാഗമായി പങ്കെടുത്തു. മേളയുടെ ഉദ്ഘാടനം വിദ്യാഭ്യാസമന്ത്രി സി. രവീന്ദ്രനാഥാണ് നിര്‍വഹിച്ചത്. പല ജില്ലകളും അവരുടേതായ തനതു ആവിഷാരങ്ങളും തങ്ങളുടെ പ്രദര്‍ശനമേളകളില്‍ കൊണ്ടുവന്നിരുന്നു.കൂടാതെ സ്‌പെഷ്യല്‍ സ്‌കൂളുകളുടെ പ്രവൃത്തിപരിചയമേളയും ശാസ്ത്രമേളയ്ക്ക് പുത്തനറിവും കാഴ്ചപ്പാടുകളും സമ്മാനിച്ചു.