തിരൂര്‍: മലേഷ്യയില്‍ നടക്കുന്ന ഇന്റര്‍നാഷനല്‍ യൂത്ത് വോളിബോള്‍ ടൂര്‍ണമെന്റിലെ ഇന്ത്യന്‍ ടീമിലേക്ക് തിരൂര്‍ സ്വദേശിയെ തെരഞ്ഞെടുത്തു.
തിരൂര്‍ മാങ്ങാട്ടിരി സ്വദേശിയും കൊടക്കല്‍ സി.എസ്.ഐ മിഷന്‍ ഹോസ്പിറ്റലിലെ കണ്‍സള്‍ട്ടന്റ് പീഡിയാട്രിഷ്യനുമായ ഡോ സുനില്‍കുമാറിന്റ മകന്‍ ശ്രീകിഷ് മൂപ്പിലിനാണ് ഇന്ത്യന്‍ ടീമില്‍ ഇടം കിട്ടിയത്.
ഊട്ടിയിലെ സെന്റ് ജൂഡ്‌സ് പബ്ലിക്് സ്‌കൂളിലെ പ്ലസ് ടു വിദ്യാര്‍ഥിയായ ശ്രീകിഷ് തമിഴ്‌നാട് യൂത്ത് ടീമില്‍ അംഗമായിരുന്നു. നവംബര്‍ ആദ്യവാരത്തില്‍ ഹൈദരാബാദില്‍ നടന്ന ദേശിയ യൂത്ത് വോളിബോള്‍ ടൂര്‍ണമെന്റില്‍ തമിഴ്‌നാട് ടീമിന്റെ വിജയത്തിന് പിന്നില്‍ ശ്രീകിഷ് ആയിരുന്നു. ഇതേത്തുടര്‍ന്നാണ് ശ്രീകിഷിനെ ഇന്ത്യന്‍ ടീമിലേക്ക് തിരഞ്ഞെടുത്തത്.
തിരുനാവായ ഭാരതീയ വിദ്യാഭവന്‍ ഹയര്‍ സെക്കന്‍ഡറി സ്‌കൂള്‍ പൂര്‍വ വിദ്യാര്‍ഥിയാണ്. ഡിസംബര്‍ 15 മുതല്‍ 17 വരെ മലേഷ്യയില്‍ വച്ചാണ് ഇന്റര്‍നാഷനല്‍ യൂത്ത് വോളിബോള്‍ ടൂര്‍ണമെന്റ് നടക്കുന്നത്.
വടകര ക്യൂന്‍സ് ഗ്രൂപ്പ് കുടുംബാംഗമായ നരിക്കളത്തില്‍ ലതിഷയാണ് മാതാവ്. സഹോദരന്‍ ശരണ്‍ ഊട്ടി സെന്റ് ജൂഡ്‌സ് പബ്ലിക്് സ്‌കൂളിലെ പത്താം ക്ലാസ് വിദ്യാര്‍ഥിയാണ്.