തിരുവനന്തപുരം: അഴിമതിക്കേസില്‍ അഡീഷണല്‍ ചീഫ് സെക്രട്ടറി ടോം ജോസിനെതിരേ സര്‍ക്കാര്‍ നടപടിയെടുക്കുമെന്നതില്‍ ശുഭാപ്തി വിശ്വാസമുണ്ടെന്ന് വിജിലന്‍സ് ഡയറക്ടര്‍ ജേക്കബ് തോമസ്. അന്വേഷണത്തിലുള്ള കേസുകളില്‍ കാലതാമസം ഉണ്ടാകുന്നത് സ്വാഭാവികമാണ്. വിജിലന്‍സിന്റെ പ്രവര്‍ത്തനങ്ങള്‍ക്കു എല്ലാവിധ പിന്തുണയും സര്‍ക്കാര്‍ നല്‍കുന്നുണ്ട്. ഈ സാഹചര്യത്തില്‍ ടോം ജോസിനെതിരായ നടപടികളിലും വിജിലന്‍സിനു ശുഭാപ്തി വിശ്വാസമാണുള്ളതെന്നും സ്വകാര്യ ചാനലിനോട് ജേക്കബ് തോമസ് പ്രതികരിച്ചു. അനധികൃത സ്വത്ത് സമ്പാദനക്കേസിലും മഗ്‌നീഷ്യം ഇറക്കുമതി ചെയ്ത കേസിലും കുറ്റക്കാരനെന്ന് കണ്ടെത്തിയ ടോം ജോസിനെ സസ്‌പെന്റ് ചെയ്യണമെന്നാണ് വിജിലന്‍സ് നല്‍കിയ ശുപാര്‍ശ.