സ്വന്തം ലേഖകന്‍

ന്യൂഡല്‍ഹി: പാര്‍ലമെന്റിന്റെ ശീതകാലസമ്മേളനത്തിന്റെ 13ാംദിവസവും ഇരുസഭകളും സ്തംഭിച്ചു. ഇതുവരെ നോട്ട് നിരോധിച്ചതുമായി ബന്ധപ്പെട്ട വിഷയങ്ങള്‍ ഉന്നയിച്ചായിരുന്നു ബഹളമെങ്കില്‍ പ. ബംഗാളിലെ ടോള്‍ ബൂത്തുകളില്‍ സൈനികരെ പരിശോധനക്കായി വിന്യസിച്ച പ്രശ്‌നമാണ് ഇന്നലെ പ്രതിപക്ഷം ഉന്നയിച്ചത്. രാജ്യസഭയില്‍ കോണ്‍ഗ്രസും തൃണമൂല്‍ കോണ്‍ഗ്രസുമാണ് പ്രശ്‌നം അവതരിപ്പിച്ചത്.
സംസ്ഥാനത്തിന്റെ ചരിത്രത്തില്‍ തന്നെ ഇത്തരത്തിലൊരു സംഭവം ആദ്യമാണെന്ന് തൃണമൂല്‍ അംഗം സുകേന്ദു ശേഖര്‍ റോയ് പറഞ്ഞു. ടോള്‍ പ്ലാസകള്‍ കൈയടക്കിയ സൈന്യം വാഹനങ്ങളില്‍ സ്റ്റിക്കര്‍ പതിക്കുന്നുണ്ടെന്നും അദ്ദേഹം പറഞ്ഞു. നോട്ട് നിരോധനത്തിന് മമത ബാനര്‍ജി പ്രതിഷേധമുയര്‍ത്തിയതിന്റെ അനന്തര ഫലമാണോ ഇതെന്നും അദ്ദേഹം ചോദിച്ചു.
കഴിഞ്ഞ വര്‍ഷം ഡിസംബറിലും ബംഗാളില്‍ സമാനമായ നടപടിയുണ്ടായിട്ടുണ്ടെന്ന പ്രതിരോധ സഹമന്ത്രി സുഭാഷ് ഭാംറേയുടെ മറുപടി തെറ്റാണെന്ന് പ്രതിപക്ഷം ചൂണ്ടിക്കാട്ടി. വിവരം ഹൗറയിലെ മജിസ്‌ട്രേറ്റിനെ ധരിപ്പിച്ചിരുന്നു എന്നു ഭാംറേ പറഞ്ഞത് മന്ത്രിസഭയെ തെറ്റിദ്ധരിപ്പിക്കാനാണെന്നും തൃണമൂല്‍ ആരോപിച്ചു.
സംസ്ഥാനത്തിന്റെ അനുമതിയില്ലാതെ ടോള്‍പ്ലാസകളില്‍ പരിശോധനക്കായി സൈന്യത്തെ വിന്യസിച്ചത് ഫെഡറല്‍ സംവിധാനത്തിനു മേലുള്ള കടന്നു കയറ്റമാണെന്ന് ബി.എസ്.പി നേതാവ് മായാവതി ആരോപിച്ചു. പ്രതിഷേധത്തിനിടെ സഭ നിയന്ത്രിക്കാന്‍ ഉപാധ്യക്ഷന്‍ പി.ജെ കുര്യന്‍ പണിപ്പെട്ടു. ഇതിനിടെ ശബ്ദം ഉയര്‍ത്തി സംസാരിച്ചതിന്റെ പേരില്‍ കോണ്‍ഗ്രസിന്റെ പ്രമോദ് തിവാരിയെയും ബി.ജെ.പി അംഗം ഭുപേന്ദര്‍ യാദവിനേയും ഉപാധ്യക്ഷന്‍ ശാസിച്ചു.
ലോക്‌സഭയില്‍ തൃണമൂല്‍ നേതാവ് സുദീപ് ബന്ദോപാധ്യായ ആണ് വിഷയം ഉന്നയിച്ചത്. സേനയെ ഇത്തരത്തിലൊരു നീക്കത്തിന് ഉപയോഗിക്കുന്നത് അപലപനീയമാണെന്ന് അദ്ദേഹം ചൂണ്ടിക്കാട്ടി.
സൈനിക വിന്യാസം നടത്തിയതു സംബന്ധിച്ച് പ്രതിരോധ മന്ത്രിയുടെ വിശദീകരണം വേണമെന്നും തൃണമൂല്‍ ആവശ്യപ്പെട്ടു. അടിയന്തരാവസ്ഥക്കു സമാനമായ സാഹചര്യം ബംഗാളില്‍ സൃഷ്ടിക്കാനാണ് കേന്ദ്രം ഇത് ആസൂത്രണം ചെയ്യുന്നതെന്നും അദ്ദേഹം ആരോപിച്ചു. എന്നാല്‍, ടോള്‍ പ്ലാസകളില്‍ നിന്ന് സൈന്യത്തെ പിന്‍വലിക്കണമെന്നാവശ്യപ്പെട്ട് പ്രതിഷേധം തുടരുന്ന മമതാ ബാനര്‍ജിയുടെ നിലപാടില്‍ വേദനയുണ്ടെന്നാണു പ്രതിരോധമന്ത്രി മനോഹര്‍ പരീക്കര്‍ ഈ വിഷയത്തില്‍ ലോക്‌സഭയില്‍ നല്‍കിയ വിശദീകരണം.
സൈന്യത്തിന്റെ പതിവ് പരിശീലന പരിപാടി മാത്രമായിരുന്നു ഇതെന്നും കഴിഞ്ഞ നവംബറില്‍ നടത്താനിരുന്ന സൈനിക വിന്യാസം കൊല്‍ക്കത്ത പോലിസിന്റെ അഭ്യര്‍ഥനയെ തുടര്‍ന്നാണ് ഡിസംബറിലേക്കു മാറ്റിയതെന്നും അദ്ദേഹം പറഞ്ഞു.