കോവളം: ഓടിക്കൊണ്ടിരുന്ന കെ.എസ്. ആര്‍.ടി.സി. ബസില്‍ നിന്നും റോഡില്‍ തെറിച്ചു വീണ് പ്‌ളസ് വണ്‍ വിദ്യാര്‍ഥിനിക്ക് പരുക്ക്. പാച്ചല്ലൂര്‍ അഞ്ചാംകല്ല് നരിക്കല്‍ വിള വീട്ടില്‍ കെരീം-സജിന ദമ്പതികളുടെ മകള്‍ ഷംനയ്ക്കാണ്  പരുക്കേറ്റത്.
ഇന്നലെ രാവിലെ എട്ടരക്ക് പാറവിളക്കും പാച്ചല്ലൂര്‍ ഗവ, എല്‍.പി. എസിനും മധ്യേയായിരുന്നു അപകടം.  കെ.എസ്.ആര്‍.ടി.സിയുടെ വിഴിഞ്ഞം ഡിപ്പോയില്‍ നിന്നുംപാച്ചല്ലൂര്‍ വഴി  തമ്പാനൂരിലേക്ക് പോയ ബസില്‍ സ്‌കൂളിലേക്ക് പോവുകയായിരുന്ന  ബസിന്റെ പുറക് വശത്ത് നില്‍ക്കുന്നതിനിടെ, പെട്ടെന്ന് ബ്രേക്കിട്ടതിനെ തുടര്‍ന്നുണ്ടായ കുലുക്കത്തില്‍ പുറത്തേക്ക് തെറിച്ച് വീഴുകയായിരുന്നുവെന്ന്  സഹയാത്രികര്‍ പറഞ്ഞു.
പുറകില്‍ നിന്നും മറ്റ് വാഹനങ്ങള്‍ ഇല്ലാതിരുന്നതിനാല്‍ വന്‍ അപകടം ഒഴിവായി. തലയ്ക്കും കഴുത്തിനും പരുക്കേറ്റ വിദ്യാര്‍ഥിനിയെ   അമ്പലത്തറയിലെ സ്വകാര്യ ആശുപത്രിയില്‍ എത്തിച്ചു. തിരുവല്ലം ബി.എന്‍.വി. ഗേള്‍സ് സ്‌കൂളിലെ വിദ്യാര്‍ഥിനിയാണ്.