ന്യൂഡല്‍ഹി: ഇന്ത്യയുടെ നോട്ടുപിന്‍വലിക്കല്‍ നടപടി അസാധാരണ നടപടിയെന്ന് നൊബേല്‍ ജേതാവും പ്രമുഖ അമേരിക്കന്‍ സാമ്പത്തിക ശാസ്ത്രജ്ഞനുമായ പോള്‍ ക്രൂഗ്മാന്‍. നോട്ടുപിന്‍വലിക്കല്‍ കൊണ്ട് ചെറിയ നേട്ടങ്ങള്‍ മാത്രമേ ഉണ്ടാവുകയുള്ളൂവെന്നും ക്രൂഗ്മാന്‍ വ്യക്തമാക്കി. ഡല്‍ഹി ദേശീയ മാധ്യമം സംഘടിപ്പിച്ച ചടങ്ങില്‍ പങ്കെടുക്കാനെത്തിയതായിരുന്നു അദേഹം. നോട്ട് പിന്‍വലിച്ചത് കൊണ്ട് പ്രശ്‌നങ്ങള്‍ പരിഹരിക്കാന്‍ സാധിക്കുമോയെന്ന് വ്യക്തമല്ല. ഉയര്‍ന്ന നോട്ടുകളുടെ ഉപയോഗം തീര്‍ത്തും അസാധുവാക്കിയിരുന്നെങ്കില്‍ അത് നല്ല തീരുമാനമായിരുന്നു. കാരണം ഉയര്‍ന്ന നോട്ടുകള്‍ കൊണ്ട് കാര്യമായിട്ടുള്ള നേട്ടങ്ങളില്ല. എന്നാല്‍ ഇവിടെ പഴയ നോട്ടുകള്‍ പിന്‍വലിക്കുകയാണ് ചെയ്തത്. പുതിയ നോട്ടുകള്‍ വൈകാതെ തന്നെ വിപണിയിലെത്തും. ഇക്കാരണത്താല്‍ നോട്ടുപിന്‍വലിക്കലിനെ മികച്ച തീരുമാനമെന്ന് വിളിക്കാനാവില്ല.