ഭട്ടിന്‍ഡ: പഞ്ചാബിലെ ഭട്ടിന്‍ഡയില്‍ വിവാഹപാര്‍ട്ടിക്കിടെ നടന്ന ആഘോഷ വെടിവയ്പ്പിനിടെ നര്‍ത്തകിയായ ഗര്‍ഭിണി കൊല്ലപ്പെട്ടു. കുല്‍വിന്ദര്‍ കൗര്‍ എന്ന 25കാരിയാണ് കൊല്ലപ്പെട്ടത്. ഭട്ടിന്‍ഡയിലെ മൗര്‍ മന്‍ദി നഗരത്തിലാണ് സംഭവം. ഇവര്‍ക്ക് വയറിന് വെടിയേല്‍ക്കുകയായിരുന്നു. സംഭവത്തില്‍ വരന്റെ സുഹൃത്തായ ബില്ലക്കെതിരേ കൊലക്കുറ്റത്തിന് പൊലിസ് കേസെടുത്തു. യുവതി മരിച്ചതറിഞ്ഞ് ഇയാള്‍ ഒളിവിലാണ്. വിവാഹാഘോഷങ്ങള്‍ക്കിടെ മണ്ഡപത്തില്‍ നിന്ന് ഇറങ്ങി വന്ന് തനിക്കൊപ്പം നൃത്തം ചെയ്യണമെന്ന ബില്ലയുടെ ആവശ്യം നിരസിച്ചതിനെ തുടര്‍ന്ന് ഇയാള്‍ വെടിവയ്ക്കുകയായിരുന്നെന്ന് കുല്‍വിന്ദറിന്റെ ഭര്‍ത്താവ് പറഞ്ഞു. എന്നാല്‍ ആഘോഷത്തിനിടെ അബദ്ധത്തില്‍ പറ്റിയതാണെന്ന് ഇതെന്ന് പൊലിസ് പറഞ്ഞു. അതേസമയം യുവതിക്ക് തൊട്ടടുത്ത് നിന്ന് വെടിയേല്‍ക്കുന്ന ദൃശ്യങ്ങള്‍ ഫേസ്ബുക്കില്‍ വൈറലായിട്ടുണ്ട്.