കക്കട്ടില്‍: പണമെത്താത്തതിനാല്‍ കുന്നുമ്മല്‍, നരിപ്പറ്റ പഞ്ചായത്തുകളിലെ എ.ടിഎമ്മുകള്‍ ദിവസങ്ങളായി അടഞ്ഞുകിടക്കുന്നു. നരിപ്പറ്റ പഞ്ചായത്തിലെ ചീക്കോന്നിലും, കുന്നുമ്മല്‍ പഞ്ചായത്തിലെ കക്കട്ടിലും എസ്.ബി.ടി.യുടെ എ.ടി.എമ്മും വട്ടോളിയില്‍ കനറാ ബാങ്കിന്റെ എ.ടി.എമ്മുമാണ് ഉള്ളത്.
അഞ്ച് ദിവസത്തിലേറെയായി ഈ മൂന്ന് എ.ടി.എമ്മുകളും അടച്ചിട്ടിരിക്കുകയാണ്. നരിപ്പറ്റ, കൈവേലി, കുമ്പളച്ചോല, അരൂര്‍.നിട്ടൂര്‍, മൊകേരി, ചങ്ങരംകുളം, പാതിരിപ്പറ്റ, വണ്ണാത്തി പൊയില്‍, കൊയ്യാല്‍, കണ്ടോത്ത് കുനി, മുള്ളമ്പത്ത്, മീത്തലെ വടയം, നമ്പിയത്താംകുണ്ട്, തുടങ്ങി യ ഉള്‍പ്രദേശങ്ങളിലുള്ളവര്‍ക്ക് ആകെ ആശ്രയം ഈ മൂന്ന് എ.ടി.എമ്മുകളാണ്.
മൂന്നും അടച്ചിട്ട തോടെ ബാങ്കുകളിലെ തിരക്ക് ക്രമാതീതമായി വര്‍ധിച്ചിട്ടുണ്ട്. കക്കട്ട് എസ്.ബി.ടിയില്‍ നിന്നും കഴിഞ്ഞയാഴ്ച 24000 രൂപ വരെ നല്‍കിയിരുന്നത് പതിനായിരമാക്കിയതും ജനത്തിന് തിരിച്ചടിയായി. അടഞ്ഞുകിടക്കുന്ന കക്കട്ടിലെ എസ്.ബി.ടിയുടെ എ.ടി.എമ്മില്‍ ഡി.വൈ.എഫ്.ഐ പ്രവര്‍ത്തകര്‍ റീത്ത് വച്ച് പ്രതിഷേധിച്ചു.