ന്യൂഡല്‍ഹി: ആയിരം, അഞ്ഞൂറ് നോട്ടുകള്‍ പിന്‍വലിച്ചതിനെ തുടര്‍ന്നു ജനങ്ങള്‍ നെട്ടോട്ടമോടുന്നതിനിടയില്‍ കള്ളപ്പണം വെളുപ്പിക്കുന്ന സംഘങ്ങള്‍ രാജ്യത്തു സജീവമാകുന്നതായി വിദേശ മാധ്യമങ്ങള്‍ റിപ്പോര്‍ട്ട് ചെയ്തു. അപ്രതീക്ഷിതമായി വന്ന നിരോധനത്തില്‍ നിയമവിരുദ്ധമായി സമ്പാദിച്ച പണം വെളുപ്പിക്കാന്‍ രാജ്യവ്യാപകമായി ആളുകള്‍ പ്രയാസപ്പെടുമ്പോഴാണ് അവസരം മുതലെടുത്തു പുതിയ മാഫിയാ സംഘങ്ങള്‍ രംഗത്തുള്ളത്.
ഈ വര്‍ഷം അവസാനം വരെ ബാങ്കുകളില്‍ ചെന്ന് നോട്ടുകള്‍ മാറ്റാന്‍ ജനങ്ങള്‍ക്കു സമയം നല്‍കിയിട്ടുണ്ടെങ്കിലും ഭീമമായ തുകയുടെ നിക്ഷേപങ്ങളും വെളിപ്പെടുത്താത്ത ഉറവിടങ്ങളില്‍നിന്നുള്ള പണവും നിരീക്ഷിക്കുകയും ടാക്‌സ് ചുമത്തുകയോ കുറ്റക്കാരനെന്നു കണ്ടെത്തി ശിക്ഷിക്കുകയോ ചെയ്യുമെന്നും സര്‍ക്കാര്‍ വ്യക്തമാക്കിയിട്ടുണ്ട്. ഇതാണു ജനങ്ങളെ മറ്റു മാര്‍ഗങ്ങളെ ആശ്രയിക്കാന്‍ പ്രേരിപ്പിച്ചത്. ഇതു കണ്ടറിഞ്ഞ് ഹവാലാ സംഘങ്ങളും മറ്റും രാജ്യത്തു പുതിയ മാര്‍ക്കറ്റ് കണ്ടെത്തി വലയെറിയുന്നതായി വിദേശമാധ്യമങ്ങള്‍ പറയുന്നു.
വളരെ തന്ത്രപരമായ മാര്‍ഗങ്ങളാണു കള്ളപ്പണം വെളുപ്പിക്കുന്ന സംഘങ്ങള്‍ ഇതിനായി അവലംബിക്കുന്നത്. വേണ്ടത്ര നിരോധനങ്ങളില്ലാത്ത വടക്കുകിഴക്കന്‍ സംസ്ഥാനങ്ങളിലേക്കുള്ള വിമാന സര്‍വിസുകളിലെ ചരക്കുകള്‍ക്കകത്തു പണം കടത്തി അയക്കുകയാണ് ഒരു വഴി. പഴയ പണം റവന്യൂ സ്വത്തായി മാറ്റാവുന്ന തരത്തില്‍ വലിയ സാമ്പത്തിക വരവുള്ള ബിസിനസ് സംരംഭങ്ങളുമായി ആളുകളെ ബന്ധപ്പെടുത്തുകയും പണത്തിന്റെ നിശ്ചിത ശതമാനം ഇത്തരം സംരംഭങ്ങളില്‍ നിക്ഷേപിച്ചു ബാക്കി തുക തിരിച്ചു നല്‍കുകയും ചെയ്യുന്ന രീതിയും ഇത്തരക്കാര്‍ ആശ്രയിക്കുന്നുണ്ട്.
പണം മാറ്റാനുള്ള പ്രയാസത്തിനനുസരിച്ചാണ് ഇതിനുള്ള പ്രതിഫലം ഈടാക്കുന്നത്. പത്തുമുതല്‍ 50 ശതമാനം വരെയാണ് ഇത്തരത്തില്‍ ഈടാക്കുന്നത്.
ബോളിവുഡ് താരങ്ങളുടെ താമസകേന്ദ്രങ്ങള്‍ കൊണ്ടു പ്രശസ്തമായ മുംബൈയിലെ പ്രാന്തപ്രദേശങ്ങളിലെ ഫ്‌ളാറ്റുകള്‍ കള്ളപ്പണത്തിനു പകരം നല്‍കുന്ന സംഘങ്ങളുമുണ്ടെന്നാണ് വിവരം.
ജനങ്ങള്‍ കള്ളപ്പണം വെളുപ്പിക്കാന്‍ ആശ്രയിക്കാനിടയുള്ള എല്ലാ പഴുതുകളുമടക്കാന്‍ സര്‍ക്കാര്‍ പരിശ്രമിക്കുമ്പോഴും മറുവശത്തു പുതിയ വാതിലുകള്‍ അതിലും വേഗത്തില്‍ തുറന്നുകൊണ്ടിരിക്കുകയാണെന്നാണ് ഇതു വ്യക്തമാക്കുന്നത്.
ജനങ്ങളുടെ തെറ്റായ രീതിയില്‍ സമ്പാദിച്ച പണം നിയമവിരുദ്ധമായ മാര്‍ഗങ്ങളിലൂടെ രക്ഷിച്ചെടുക്കാനുള്ള എല്ലാ ശ്രമങ്ങളും തടയുമെന്നു പ്രധാനമന്ത്രി നരേന്ദ്രമോദി കഴിഞ്ഞ ആഴ്ചയിലെ 'മന്‍കി ബാത്ത് ' റേഡിയോ പ്രഭാഷണത്തിലും പ്രഖ്യാപിച്ചിരുന്നു.