ദോഹ: വാഷിങ്ടണില്‍ നിന്ന് ദോഹയിലേക്കുള്ള ഖത്തര്‍ എയര്‍വേയ്‌സ് വിമാനം ശക്തമായ ആകാശച്ചുഴിയില്‍പ്പെട്ടതിനെ തുടര്‍ന്ന് പോര്‍ച്ചുഗീസ് ദ്വീപായ അസോറസിലേക്കു തിരിച്ചുവിട്ടു.
ക്യുആര്‍708 വിമാനത്തിലെ ഏതാനും യാത്രക്കാര്‍ക്ക് പരുക്കേറ്റതായി പ്രാദേശിക വാര്‍ത്താ ഏജന്‍സി ലുസ റിപോര്‍ട്ട് ചെയ്തു. ഞായറാഴ്ചയാണ് സംഭവം.
ലാജസ് എയര്‍പോര്‍ട്ടില്‍ ഇറങ്ങിയ വിമാനത്തില്‍ നിന്ന് മൂന്നുപേരെ തൊട്ടടുത്ത ആശുപത്രിയിലേക്കു മാറ്റി. രണ്ടുപേരെ നിരീക്ഷണത്തിന് ശേഷം വിട്ടയച്ചു.
ഒരാള്‍ക്ക് രാത്രി മുഴുവന്‍ ആശുപത്രിയില്‍ കഴിയേണ്ടി വന്നു. ലാജസ് വിമാനത്താവളത്തില്‍ തങ്ങള്‍ക്ക് വേണ്ട പരിഗണന കിട്ടിയില്ലെന്ന് യാത്രക്കാരില്‍ ചിലര്‍ ആരോപിച്ചു. വിമാനത്തില്‍ 300ഓളം യാത്രക്കാരാണുണ്ടായിരുന്നത്.