എടച്ചേരി: ഒപ്പന മത്സരത്തിന്റെ വേദിക്ക് വേണ്ടത്ര വലിപ്പമില്ലെന്ന് പരാതി. പുറമേരിയില്‍ നടക്കുന്ന ചോമ്പാല്‍ ഉപജില്ലാ സ്‌കൂള്‍ കലോത്സവത്തില്‍ ഒപ്പന മത്സരം നടന്ന വേദിയെ കുറിച്ചാണ് ഓര്‍ക്കാട്ടേരി മാപ്പിള യു.പി സ്‌കൂള്‍ ടീമിന്റെ  പരിശീലകന്‍ പരാതി അറിയിച്ചത്. പുറമേരി  ഹൈസ്‌കൂള്‍ മൈതാനിയുടെ കിഴക്ക് ഭാഗത്തൊരുക്കിയ വേദിയിലാണ് ഇന്നലെ വൈകീട്ട് ഒപ്പന മത്സരം നടന്നത്. യു.പി വിഭാഗം മത്സരഫലം വന്നയുടനെയാണ് വിവാദമുയര്‍ന്നത്. സ്റ്റേജിന്റെ പരിമിതി മൂലം തങ്ങളുടെ കുട്ടികള്‍ കളിക്കുന്നതിനിടെ വീഴാനിടയായതാണ് ഒന്നാം സ്ഥാനം നഷ്ടപ്പെട്ടതെന്നാണ് പരിശീലകന്റെയും മറ്റു അധ്യാപകരുടെയും പരാതി. നന്നായി പാടി കളിച്ച തങ്ങളുടെ കുട്ടികള്‍ രണ്ടാം സ്ഥാനത്തേക്ക് തള്ളപ്പെടാന്‍ ഇടയായ വിധികര്‍ത്താക്കളുടെ തീരുമാനത്തിലും ഇവര്‍ക്ക് പരാതിയുണ്ട്. അപ്പീല്‍ വഴി ജില്ലാ മത്സരത്തില്‍  പങ്കെടുക്കാനാണ് ഇവരുടെ തീരുമാനം.അതേസമയം തങ്ങളുടെ വിധി നീതി പൂര്‍വമാണെന്നും കുട്ടി വീഴാനിടയായതാണ് നേരിയ പോയന്റ് വ്യത്യാസത്തില്‍ ഈ സ്‌കൂളിന് ജില്ലാ മത്സരത്തില്‍ പങ്കെടുക്കാനുളള അവസരം നഷ്ടമായതെന്നും  വിധികര്‍ത്താക്കളിലൊരാളായ എം.കെ അഷ്‌റഫ് അറിയിച്ചു.