കോഴിക്കോട്: വിജയവാഡയില്‍ നടന്ന ദേശീയ സബ് ജൂനിയര്‍ ബാഡ്മിന്റണ്‍ ഡബിള്‍സ് ചാംപ്യന്‍ഷിപ്പില്‍ ചാംപ്യന്മാരായ എഡ്വിന്‍ ജോയ്, അരവിന്ദ് സുരേഷ് എന്നിവര്‍ക്ക് ജില്ലാ ബാഡ്മിന്റണ്‍ അസോസിയേഷന്റെ നേതൃത്വത്തില്‍ സ്വീകരണം നല്‍കി. അഞ്ചിനായിരുന്നു മല്‍സരം നടന്നത്. ഇരുവരും സായി ഗോപീ ചന്ദ് അക്കാദമി വിദ്യാര്‍ഥികളാണ്. എഡ്വിന്‍ കോഴിക്കോട് സെന്റ് ജോസഫ് ബോയ്‌സ് സ്‌കൂളിലും, അരവിന്ദ് സില്‍വര്‍ഹില്‍സ് സ്‌കൂളിലും ഒന്‍പതാം തരം വിദ്യാര്‍ഥികളാണ്. ബാഡ്മിന്റണ്‍ താരം എ.നാസറിന്റെ കീഴിലാണ് ഇരുവരുടേയും പരിശീലനം. മെഡിക്കല്‍ കോളജ് സ്വദേശികളായ ജോയിയുടേയും ലിഷയുടേയും മകനാണ് എഡ്വിന്‍. വൃദ്ധാവന്‍ കോളനി സ്വദേശിയായ അരവിന്ദ് സുരേഷ്- ജിജി ദമ്പതികളുടെ മകനാണ്.
കോഴിക്കോട് റെയില്‍വേ സ്‌റ്റേഷനില്‍ നടന്ന സ്വീകരണച്ചടങ്ങില്‍ ബാഡ്മിന്റണ്‍ അസോസിയേഷന്‍ ഭാരവാഹികളായ ബിനോയ്, വല്‍സലന്‍, മുസമ്മില്‍, ബാഡ്മിന്റണ്‍ വെല്‍വിഷേഴ്‌സ് അസോസിയേഷന്‍ ഭാരവാഹികളായ സുജിത്ത് കുമാര്‍, മനീഷ്‌കുമാര്‍, റോയ് എന്നിവര്‍ പങ്കെടുത്തു.