തലശ്ശേരി: സബ്ജില്ലാ കലോത്സവത്തില്‍ മലയാള പദ്യത്തില്‍ പരാജയപ്പെട്ട ആരാധ്യ ജില്ലാ കലോത്സവത്തിനെത്തിയത് കോടതി ഉത്തരവുമായി. ഒടുവില്‍ ആരാധ്യ മടങ്ങിയത് ഒന്നാം സ്ഥാനവുമായി. പെരളശ്ശേരി എ.കെ.ജി സ്മാരക ഗവ.ഹയര്‍ സെക്കന്‍ഡറി സ്‌കൂള്‍ പ്ലസ്ടു വിദ്യാര്‍ഥിനിയായ ആരാധ്യ രാകേഷ് ഹയര്‍ സെക്കന്‍ഡറി വിഭാഗം മലയാള പദ്യത്തില്‍ കണ്ണൂര്‍ സൗത്ത് ഉപജില്ലാ മത്സരത്തില്‍ പരാജയപ്പെടുകയായിരുന്നു. അപ്പീല്‍ കമ്മറ്റിക്കു പരാതി നല്‍കിയെങ്കിലും അംഗീകരിച്ചില്ല. ഒടുവില്‍ തലശ്ശേരി കോടതി മുഖേന ആരാധ്യ റവന്യൂ ജില്ലാ കലോത്സവത്തില്‍ പങ്കെടുക്കാനുള്ള അനുമതി നേടുകയായിരുന്നു. പെരളശ്ശേരി പാനാരിച്ചാലിലെ മൃദംഗം ആര്‍ട്ടിസ്റ്റ് രാകേഷിന്റെയും കലാമണ്ഡലം ഉഷാ നന്ദിനിയുടെയും മകളാണ്.