കോട്ടയം: ഉദ്യോഗസ്ഥര്‍ ജനപക്ഷ നിലപാട് സ്വീകരിക്കണമെന്നു മന്ത്രി ഇ ചന്ദ്രശേഖരന്‍ പറഞ്ഞു. ലാന്‍ഡ് റവന്യു സംബന്ധിച്ച പ്രശ്‌നങ്ങള്‍ ചര്‍ച്ച ചെയ്യുന്നതിനു കോട്ടയം മാമ്മന്‍ മാപ്പിള ഹാളില്‍ വിളിച്ചു ചേര്‍ത്ത വില്ലേജ് ഓഫിസര്‍മാരുടെ യോഗത്തില്‍ സംസാരിക്കുകയായിരുന്നു അദ്ദേഹം.
റവന്യു ഭൂമിയും റവന്യു രേഖകളും സംരക്ഷിക്കേണ്ട ഉത്തരവാദിത്തം വില്ലേജ് ഓഫിസര്‍മാര്‍ക്കുണ്ട്. സര്‍ക്കാര്‍ മാറിമാറി വന്നാലും പാലിക്കേണ്ട നിയമങ്ങളും ചട്ടങ്ങളും ഒന്നു തന്നെയാണ്. അവ പാലിക്കേണ്ട ബാധ്യത എല്ലാ ഉദ്യോഗസ്ഥര്‍ക്കുമുണ്ട്. വില്ലേജ് ഓഫിസുകളുടെ അടിസ്ഥാന സൗകര്യം വര്‍ധിപ്പിച്ച് ആധുനികമാക്കുന്നതിനും നടപടി സ്വീകരിക്കും. വാടകക്കെട്ടിടത്തില്‍ പ്രവര്‍ത്തിക്കുന്ന വില്ലേജ് ഓഫിസുകള്‍ക്ക് അടിയന്തിരമായി സ്വന്തം കെട്ടിടം നിര്‍മിക്കുന്നതിനും നടപടിയെടുക്കും.
ഉദ്യോഗസ്ഥരില്‍ നിന്ന് മാന്യമായ ഇടപെടലും പെരുമാറ്റവും ജനങ്ങള്‍ പ്രതീക്ഷിക്കുന്നു. ജനങ്ങളുടെ പ്രതീക്ഷയ്ക്ക് അനുസരിച്ച് ഉയരുന്നുണ്ടോ എന്ന് ഉദ്യോഗസ്ഥര്‍ സ്വയം വിലയിരുത്തണം.
ഉദ്യോഗസ്ഥരുടെ സ്ഥലംമാറ്റത്തിന് പൊതുമാനദണ്ഡം കൊണ്ടുവരും. സ്വന്തം അധികാരങ്ങളഎ കുറിച്ചും ഉത്തരവാദിത്തങ്ങളെ കുറിച്ചും വില്ലേജ് ഓഫിസര്‍മാര്‍ക്ക് ഉത്തമബോധ്യം ഉണ്ടായിരിക്കണം. എല്ലാ ജില്ലകളിലും റവന്യു സംബന്ധിച്ച പ്രശ്‌നങ്ങള്‍ക്ക് സമാനമാണ്. റിസര്‍വേ പുനരാരംഭിക്കാനും ഡ്രാഫ്റ്റ് ഡാറ്റാ ബാങ്ക് പരിഷ്‌കരിക്കാനും നടപടിയുണ്ടാകുമെന്നും മന്ത്രി പറഞ്ഞു. യോഗത്തില്‍ കലക്ടര്‍ സ്വാഗതവും എ.ഡി.എം പി അജന്താ കുമാരി നന്ദിയും പറഞ്ഞു. ഇടുക്കി എ.ഡി.എം, എറണാകുളം എ.ഡി.എം സി.കെ പ്രകാശ്, ഡെപ്യൂട്ടി കലക്ടര്‍മാര്‍, വില്ലേജ് ഓഫിസര്‍മാര്‍ തുടങ്ങിയവര്‍ പങ്കെടുത്തു.