പാലാ: 66 മത് അഖിലേന്ത്യാ അന്തര്‍ സര്‍വകലാശാലാ പുരുഷ വോളിബോള്‍ ടൂര്‍ണമെന്റില്‍ എം.ജി, കാലിക്കറ്റ് സര്‍വകലാശാലകള്‍ ക്വാര്‍ട്ടറില്‍. എം.ജി ലീഗ് മത്സരങ്ങളെല്ലാം ജയിച്ചപ്പോള്‍ കാലിക്കറ്റ് കുരുക്ഷേത്ര യൂനിവേഴ്‌സിറ്റിയോടു പരാജയപ്പെട്ട് പൂളില്‍ രണ്ടാമതെത്തി. ദക്ഷിണമേഖലയിലെ ഒന്നും രണ്ടും സ്ഥാനക്കാരായ ഭാരതിയാര്‍, അണ്ണാ യൂനിവേഴ്‌സിറ്റികള്‍ എല്ലാ ലീഗ് മത്സരങ്ങളും വിജയിച്ച് ക്വാര്‍ട്ടറുറപ്പിച്ചു. വടക്കന്‍ മേഖലയില്‍ നിന്നു കുരുക്ഷേത്ര, ഹരിയാന, പഞ്ചാബി യൂനിവേഴ്‌സിറ്റി പട്യാല, പഞ്ചാബ്, ചണ്ഡിഗഢ് സര്‍വകലാശാലകളും ക്വാര്‍ട്ടറില്‍ കടന്നു. കിഴക്കന്‍ മേഖലയിലെ യൂനിവേഴ്‌സിറ്റികളെല്ലാം പരാജയപ്പെട്ടപ്പോള്‍ പശ്ചിമ മേഖലയില്‍ മൂന്നാമതെത്തി സൗത്ത് ഗുജറാത്ത് യൂനിവേഴ്‌സിറ്റിയും ക്വാര്‍ട്ടറിലെത്തി.
ഇന്നു നടക്കുന്ന ക്വാര്‍ട്ടര്‍ ഫൈനല്‍ മത്സരങ്ങളില്‍ രാവിലെ എം.ജി- സൗത്ത് ഗുജറാത്ത് യൂനിവേഴ്‌സിറ്റിയേയും അണ്ണാ- പഞ്ചാബി യൂനിവേഴ്‌സിറ്റിയേയും നേരിടും. വൈകിട്ട് കുരുക്ഷേത്ര- പഞ്ചാബ് യൂനിവേഴ്‌സിറ്റിയെയും കാലിക്കറ്റ്- ഭാരതിയാര്‍ യൂനിവേഴ്‌സിറ്റിയെയും നേരിടും. നാളെ വൈകിട്ട് നാലു മണിക്ക് സെമി ഫൈനല്‍ മത്സരങ്ങള്‍ നടക്കും.