പാപ്പിനിശ്ശേരി: പാപ്പിനിശ്ശേരി റെയില്‍വേ സ്റ്റേഷനു സമീപമുള്ള കൂറ്റന്‍ ആല്‍മരത്തില്‍ തീപിടുത്തം. നാട്ടുകാരുടെയും ഫയര്‍ഫോഴ്‌സിന്റെയും സമയോചിതമായ ഇടപെടലിലൂടെ വന്‍ ദുരന്തം ഒഴിവായി. ഇന്നലെ വൈകുന്നേരം ആറു മണിയോടെയാണ് റെയില്‍വെ ഗേറ്റിനു സമീപം രാജാസ് റോഡില്‍ നിന്നു തീപടരുന്നത് പ്രദേശവാസികള്‍ കണ്ടത്. തീ ശക്തമായി കത്തിപ്പടര്‍ന്ന് സമീപത്തുള്ള  ആല്‍മരത്തിലേക്കും പടര്‍ന്ന് പിടിച്ചു. ഓടിക്കൂടിയ നാട്ടുകാര്‍ സമീപത്തുള്ള വൈദ്യുതി ബന്ധം വേര്‍പെടുത്തി. റെയില്‍വെഗേറ്റ് കടന്നു വരുന്ന വാഹനങ്ങളെ മുഴുവന്‍ വഴിതിരിച്ചു വിട്ടു. സമീപത്തുള്ള വീടുകളില്‍ നിന്നു വെള്ളം എത്തിച്ച്  തീ അണക്കുന്നതിന് ശ്രമം നടത്തി. എന്നാല്‍ നാട്ടുകാരുടെ ശ്രമം പരാജയപ്പെട്ടപ്പോള്‍ 7.30 ന് കണ്ണൂരില്‍ നിന്ന് ഒരു യൂണിറ്റ് ഫയര്‍ ഫോഴ്‌സ് എത്തി. തുടര്‍ന്ന് രാത്രി എട്ടുമണിയോടെ തീ അണക്കുകയായിരുന്നു. ശക്തമായി തീ പടര്‍ന്നതു മൂലം ആല്‍മരത്തിന്റെ  അടിഭാഗം ഭൂരിഭാഗവും കത്തിയമര്‍ന്നു.