അരീക്കോട്: രണ്ടു മാസമായി സെക്രട്ടറിയില്ലാത്ത അരീക്കോട് ഗ്രാമ പഞ്ചായത്തിലേക്ക് സെക്രട്ടറിയായി നിയമനം ലഭിച്ചയാള്‍ പഞ്ചായത്ത് അംഗങ്ങളുടെ എതിര്‍പ്പിനെ തുടര്‍ന്ന് പഞ്ചായത്തിലെത്തിയില്ല. മുക്കം സ്വദേശി സി.പി സുബൈറാണ് എതിര്‍പ്പിനെ തുടര്‍ന്ന് പള്ളിക്കല്‍ പഞ്ചായത്തില്‍ തന്നെ തുടരാന്‍ തീരുമാനിച്ചത്. കഴിഞ്ഞ ഏഴു വര്‍ഷമായി അരീക്കോട് പഞ്ചായത്തില്‍ സെക്രട്ടറിയായിരുന്ന ഇദ്ദേഹം രണ്ടു മാസം മുന്‍പാണ് കീഴാറ്റൂര്‍ പഞ്ചായത്തിലേക്കു മാറിയത്. ഒരു മാസം തികയും മുമ്പെ പള്ളിക്കല്‍ ഗ്രാമ പഞ്ചായത്തിലേക്കു മാറുകയും ചെയ്തു.
കഴിഞ്ഞ ബുധനാഴ്ചയാണ് അരീക്കോട് പഞ്ചായത്തില്‍ തന്നെ വീണ്ടും സെക്രട്ടറിയായി ചുമതലയേല്‍ക്കാന്‍ സംസ്ഥാന പഞ്ചായത്ത് അഡീഷണല്‍ സെക്രട്ടറി ഉത്തരവിട്ടത്. പഴയ സെക്രട്ടറി മടങ്ങിവരുന്നതറിഞ്ഞതോടെ അരീക്കോട് പഞ്ചായത്ത് പ്രസിഡന്റ്  അമ്പായത്തിങ്ങല്‍ മുനീറ തദ്ധേശ സ്വയം ഭരണ മന്ത്രി കെ.ടി ജലീലിന് സെക്രട്ടറിയുടെ മടങ്ങി വരവില്‍ അതൃപ്തി അറിയിച്ച് മെയില്‍ സന്ദേശം അയച്ചിരുന്നു. സെക്രട്ടറിയുടെ ഓഫിസ് അടച്ചിടുന്നതടക്കമുള്ള പ്രതിഷേധ മുറകളെക്കുറിച്ച് പഞ്ചായത്ത് അംഗങ്ങളും ആലോചിച്ചു. ഇതറിഞ്ഞതോടെയാണ് അരീക്കോട്ടേക്കില്ലെന്ന തീരുമാനത്തില്‍ സെക്രട്ടറിയെത്തിയത്.
     2009 മുതല്‍ കഴിഞ്ഞ രണ്ടു മാസം മുന്‍പ് വരെ അരീക്കോട് പഞ്ചായത്തില്‍  ജോലി ചെയ്ത ഇദ്ദേഹം ബോര്‍ഡിന്റെ നിലപാടുകള്‍ക്ക് വിരുദ്ധമായാണ് പ്രവര്‍ത്തിച്ചതെന്നാണ് അംഗങ്ങളുടെ ആക്ഷേപം. ഭൂമാഫിയയെ സഹായിക്കുന്ന നിലപാടുകളാണ് ഇദ്ദേഹത്തിനുള്ളതെന്നും പഞ്ചായത്ത് അംഗങ്ങള്‍ പറയുന്നു.
ഭിന്നശേഷിക്കാരായ കുട്ടികള്‍ക്ക് പഞ്ചായത്ത് നടപ്പാക്കാനുദ്ധേശിച്ച ട്രൈനിങ് സെന്റര്‍, അരീക്കോട് ചന്ത, കുടിവെള്ള പദ്ധതിക്കായുള്ള പൈപ്പ് ലൈന്‍, ഫുട്‌ബോള്‍ കോച്ചിങ്, ലൈബ്രറി തുടങ്ങിയ വിവിവിധയിനം പദ്ധതികള്‍ക്കു കരട് രേഖയില്‍ പ്രഖ്യാപിച്ച തുകയില്‍ തിരിമറി നടത്തി ഡി.ഡി.പിക്ക് സെക്രട്ടറി അയച്ചു കൊടുത്തെന്നും വികസന പ്രവര്‍ത്തനങ്ങള്‍ക്ക് തടസം നിന്നതായും പഞ്ചായത്ത് അംഗങ്ങള്‍ സുപ്രഭാതത്തോട് പറഞ്ഞു.  
എന്നാല്‍ പള്ളിക്കല്‍ പഞ്ചായത്തില്‍ തുടരാനാണ് താല്‍പര്യമെന്നും തല്‍ക്കാലം അരീക്കോട് പഞ്ചായത്തിലേക്ക് മാറുന്നില്ലെന്നുമാണ് സെക്രട്ടറി സി.പി സുബൈര്‍ പറയുന്നത്.