മനാമ: പ്രവാചകന്‍ മുഹമ്മദ് നബി(സ)യുടെ ജന്മദിനം ഇന്ന് ഗള്‍ഫ് രാഷ്ട്രങ്ങളില്‍ സമുചിതമായി ആഘോഷിക്കുന്നു.
ആഘോഷത്തിന്റെ ഭാഗമായി ബഹ്‌റൈനടക്കമുള്ള മിക്ക ജി.സി.സി രാഷ്ട്രങ്ങളിലും ഔഖാഫ് മന്ത്രാലയങ്ങളുടെയും മതകാര്യ വിഭാഗങ്ങളുടെയും നേതൃത്വത്തില്‍ ഔദ്യോഗിക പരിപാടികളും നടക്കുന്നുണ്ട്. ഇതോടൊപ്പം വിവിധ പ്രവാസി മത സംഘടനകളുടെ കീഴിലും വിപുലമായ നബിദിന പരിപാടികളാണ് വിവിധ രാഷ്ട്രങ്ങളില്‍ സംഘടിപ്പിച്ചിരിക്കുന്നത്.

ചില ഭാഗങ്ങളില്‍ പൊതുപരിപാടികള്‍ക്ക് നിയന്ത്രണങ്ങളുണ്ടെങ്കിലും സംഘടനാ ആസ്ഥാനങ്ങളിലും ഓഡിറ്റോറിയങ്ങളിലുമായാണ് പ്രവാസി സംഘടനകളുടെ നബിദിനാഘോഷങ്ങള്‍ പ്രധാനമായും നടക്കുന്നത്. നബിദിന രാവായ കഴിഞ്ഞ ദിവസം രാത്രിയിലും ഇന്നു പുലര്‍ച്ചെയുമായി മൗലിദ് പാരായണങ്ങള്‍ നടന്നിരുന്നു. സമസ്ത ബഹ്‌റൈന്‍ കേന്ദ്ര കമ്മറ്റിയുടെ കീഴില്‍ മനാമയിലെ യമനി മസ്ജിദില്‍ ഇശാ നിസ്‌കാര ശേഷം വിപുലമായ മൗലിദ് മജ്‌ലിസും പ്രാര്‍ഥനാ സദസ്സും സംഘടിപ്പിച്ചിട്ടുണ്ട്. കൂടാതെ നബിദിന ദിവസം പുലര്‍ച്ചെ സുബ്ഹി നമസ്‌കാരത്തോടനുബന്ധിച്ച് മനാമ ഗോള്‍ഡ് സിറ്റി ആസ്ഥാനത്തും മൗലിദ് ചടങ്ങും അന്നദാനവും നടക്കും.

സമസ്ത ബഹ്‌റൈന്‍ പ്രസിഡന്റ് കൂടിയായ സയ്യിദ് ഫഖ്‌റുദ്ദീന്‍ തങ്ങളാണ് ചടങ്ങുകള്‍ക്ക് നേതൃത്വം നല്‍കുന്നത്.
സമസ്ത ബഹ്‌റൈന്‍ ഘടകത്തിന്റെ വിവിധ ഏരിയാ കമ്മറ്റി ഭാരവാഹികളും പോഷകസംഘടനാ പ്രവര്‍ത്തകരും ചടങ്ങില്‍ പങ്കെടുക്കും. തുടര്‍ന്നുള്ള ദിവസങ്ങളില്‍ 15 ഓളം ഏരിയകളില്‍ വൈവിധ്യമാര്‍ന്ന നബിദിനാഘോഷ പരിപാടികളും സംഘടിപ്പിച്ചിട്ടുണ്ട്.

അബൂദാബിയിലെ ഇന്ത്യന്‍ ഇസ്‌ലാമിക് സെന്ററില്‍ മഗ്‌രിബ് നമസ്‌കാര ശേഷമാണ് മൗലിദ് മജ്‌ലിസ് സംഘടിപ്പിച്ചിട്ടുള്ളതെന്ന് ബന്ധപ്പെട്ടവര്‍ അറിയിച്ചു. സമസ്ത വൈസ് പ്രസിഡന്റ് എം.ടി അബ്ദുല്ല മുസ്‌ലിയാര്‍, ഡോ. സാലിം ഫൈസി കൊളത്തൂര്‍, കാളാവ് സൈതലവി മുസ്‌ലിയാര്‍, പലര്‍ മുഹമ്മദ് കുട്ടി മുസ്‌ലിയാര്‍ എന്നിവര്‍ ചടങ്ങില്‍ പങ്കെടുക്കുന്നുണ്ട്.
പദ്യഗദ്യ രൂപങ്ങളിലുള്ള പ്രവാചക പ്രകീര്‍ത്തന സദസ്സുകളും പ്രമുഖരുടെ പ്രഭാഷണങ്ങളും മദ്‌റസാ വിദ്യാര്‍ഥികളുടെ കലാ പരിപാടികളും ഉള്‍പ്പെടുന്നതാണ് വിവിധ ഭാഗങ്ങളില്‍ നടക്കുന്ന നബിദിന ആഘോഷപരിപാടികള്‍. റബീഉല്‍ അവ്വല്‍ അവസാനം വരെയും ഇത് തുടരും.