സുല്‍ത്താന്‍ ബത്തേരി: മാലിന്യവുമായി കറങ്ങിയ ലോറി മൂലഹള്ള ഫോറസ്റ്റ് ചെക്‌പോസ്റ്റില്‍ തടഞ്ഞു. കര്‍ണാടക രജിസ്‌ട്രേഷനുള്ള ലോറിയാണ് തടഞ്ഞിട്ടത്. മൂലഹള്ള പാലത്തിനടുത്തായി വാഹനം ഉപേക്ഷിച്ച് ഡ്രൈവര്‍ കടന്നുകളഞ്ഞു. കോഴിക്കോട് നിന്നോ മലപ്പുറത്ത് നിന്നോ ഉള്ള കോഴിവേസ്റ്റാണ് വാഹനത്തിലെന്നു പോലിസ് പറഞ്ഞു. കുട്ട വഴി കടന്നുപോവാന്‍ ശ്രമിക്കവെ, ചെക്‌പോസ്റ്റില്‍ തടഞ്ഞ് തിരിച്ചയക്കുകയായിരുന്നു. തുടര്‍ന്നാണ് മുത്തങ്ങ വഴി കര്‍ണാടകയിലേക്ക് പ്രവേശിക്കാന്‍ ശ്രമിച്ചത്.  മാസങ്ങള്‍ക്കു മുമ്പ് മുത്തങ്ങ വനത്തിലും മാലിന്യം നിക്ഷേപിച്ചു. ഇവര്‍ക്കെതിരേ കേസെടുക്കുകയും വാഹനം പിടിച്ചെടുക്കുകയും ചെയ്തു. എന്നാല്‍, ജില്ലയിലേക്ക് മാലിന്യവണ്ടികള്‍ എത്തുന്നതിന് യാതൊരു കുറവുമുണ്ടായിട്ടില്ല.