ഇരിട്ടി: ഗ്രീന്‍ലീഫ് അഗ്രിഹോര്‍ട്ടി കള്‍ച്ചര്‍ സൊസൈറ്റിയുടെ നേതൃത്വത്തില്‍ നടക്കുന്ന പുഷ്‌പോത്സവം നാളെ മുതല്‍ ജനുവരി ഒന്നു വരെ ഇരിട്ടിയില്‍ നടക്കുമെന്നു സംഘാടകര്‍ അറിയിച്ചു. തവക്കല്‍ കോംപ്ലക്‌സിനരികെ നാലേക്കറോളം സ്ഥലത്തു തയാറാക്കിയ നഗരിയിലാണു പ്രദര്‍ശനം. നാളെ വൈകുന്നേരം നാലിനു സണ്ണി ജോസഫ് എം.എല്‍.എ ഉദ്ഘാടനം ചെയ്യും. ഗ്രീന്‍ലീഫ് ചെയര്‍മാന്‍ സി അഷറഫ് അധ്യക്ഷനാവും.
അമ്യൂസ്‌മെന്റ് പാര്‍ക്ക് ഇരിട്ടി നഗരസഭാ ചെയര്‍മാന്‍ പി.പി അശോകനും ഫയര്‍ഫോഴ്‌സ് പ്രദര്‍ശനം ഇരിട്ടി ബ്ലോക്ക് പഞ്ചായത്ത് പ്രസിഡന്റ് എന്‍.ടി റോസമ്മയും എക്‌സൈസ് പ്രദര്‍ശനം പേരാവൂര്‍ ബ്ലോക്ക് പഞ്ചായത്ത് പ്രസിഡന്റ് ടി പ്രസന്നയും ശുചിത്വ മിഷന്‍ പ്രദര്‍ശനം തഹസില്‍ദാര്‍ കെ.കെ സുരേഷും ഫോട്ടോ പ്രദര്‍ശനം ഡി.വൈ.എസ്.പി പ്രജീഷ് തോട്ടത്തിലും ആറളം ഫാം സ്റ്റാള്‍ ആറളം ഫാമിങ് കോര്‍പറേഷന്‍ എം.ഡി ടി.കെ വിശ്വനാഥനും പരിയാരം മെഡിക്കല്‍ കോളജ് മെഡിക്കല്‍ എക്‌സിബിഷന്‍ വൈസ് ചെയര്‍മാന്‍ പി പുരുഷോത്തമനും റെയ്ഡ്‌കോ കാര്‍ഷികോപകരണ പ്രദര്‍ശനം ചെയര്‍മാന്‍ വല്‍സന്‍ പനോളിയും ഉദ്ഘാടനം ചെയ്യും.
ചിത്രരചനാ മത്സരം 17നു പത്തിനും മൈലാഞ്ചിയിടല്‍ മത്സരം 19ന് ഒന്നിനും നാട്ടുരുചി നാടന്‍ പാചക മത്സരം 22ന് 2.30 നും നടക്കും. കൂടുതല്‍ വിവരങ്ങള്‍ക്കും രജിസ്‌ട്രേഷനും 7025934101 നമ്പറില്‍ ബന്ധപ്പെടണം. മാലിന്യ നിര്‍മാര്‍ജനത്തിനും ഹരിതവല്‍ക്കരണ ജലസംരക്ഷണത്തിനും പ്രാമുഖ്യം നല്‍കിയായിരിക്കും പുഷ്‌പോത്സവം. ഉച്ചയ്ക്ക് 1.30 മുതല്‍ രാത്രി 8.30 വരെയാണ് പ്രദര്‍ശനം നടക്കുകയെന്നും ഭാരവാഹികളായ സി അഷറഫ്, സി.എ. അബ്ദുള്‍ ഗഫൂര്‍, പി അശോകന്‍, ഡോ. എം.ജെ മാത്യു, ബിനു കുളമക്കാട്ട്, സി ബാബു, പി.പി രജീഷ്, എന്‍.ജെ ജോഷി, കെ.ആര്‍ രാഹുല്‍ എന്നിവര്‍ അറിയിച്ചു.