ചേര്‍ത്തല: പാനീയങ്ങള്‍ തണുപ്പിച്ച് ഉപയോഗിക്കുന്നതിന് കൂള്‍-ബി എന്ന ഫ്‌ളാസ്‌ക് വികസിപ്പിച്ചെടുത്ത് ഊര്‍ജസംരക്ഷണ പ്രവര്‍ത്തനത്തില്‍ മറ്റൊരു ചുവടുവയ്പ് കൂടി നടത്തുകയാണ് കെ.എസ്.ഇ.ബി ഉദ്യോഗസ്ഥനായ കെ.സി ബൈജു. കഴിഞ്ഞ വര്‍ഷത്തെ സംസ്ഥാന ഊര്‍ജസംരക്ഷണ അവാര്‍ഡ് ജേതാവായ ബൈജു ഇതിനകം നിരവധി കണ്ടുപിടിത്തങ്ങളിലൂടെ ശ്രദ്ധേയനാണ്. ബുധനാഴ്ച ദേശീയ ഊര്‍ജസംരക്ഷണ ദിനാചരണം പ്രമാണിച്ചാണ് പ്രത്യേകതരം കൂള്‍ബോട്ടില്‍ ഫ്‌ളാസ്‌ക് (കൂള്‍-ബി) നാടിന് സമര്‍പ്പിക്കുന്നത്.
ഫ്രിഡ്ജിനുള്ളില്‍ വച്ച് തണുപ്പിക്കുന്ന പാനീയം പുറത്തെടുത്താല്‍ അതിവേഗം തണുപ്പകലും. എന്നാല്‍ കൂള്‍-ബിയിലൂടെ ഏറെനേരം തണുപ്പ് നിലനിര്‍ത്താമെന്നതാണ് സവിശേഷത. ലോഹനിര്‍മിതമായ ഫ്‌ളാസ്‌കിന് ചെലവ് നന്നേ കുറവാണ്. സ്‌റ്റെയിന്‍ലെസ് സ്റ്റീല്‍ നിര്‍മിത കുപ്പിക്കുള്ളില്‍ ഘടിപ്പിച്ച മറ്റൊരു കുപ്പിയാണ് പ്രധാനഭാഗം. രണ്ടിന്റെയും ഇടയിലുള്ള ഭാ
ഗത്ത് വെള്ളമോ ബ്രെയിന്‍ ലായനിയോ ആണ് നിറയ്ക്കുക. ശേഷം ഫ്രിഡ്ജില്‍ വയ്ക്കുമ്പോള്‍ ദ്രവരൂപം തണുപ്പ് ആഗീകരണം ചെയ്യും. ആവശ്യമുള്ളപ്പോള്‍ പുറത്തെടുത്ത് കാലിയായ രണ്ട് കുപ്പികളിലുമുള്ള കുഴലില്‍ പാനീയം നിറച്ചാല്‍ അതിലേക്ക് പെട്ടെന്ന് തണുപ്പ് വ്യാപിക്കും. പാനീയം വിളമ്പേണ്ട നേരത്ത് കൂള്‍-ബിയിലൂടെ കടത്തിവിട്ട് പാത്രത്തില്‍ തണുപ്പോടെ ശേഖരിക്കുന്നതിനുള്ള സംവിധാനവും ഉണ്ട്. ഇങ്ങനെ പാനിയത്തിന്റെ തണുപ്പ് ക്രമീകരിച്ച് ഉപയോഗം സാധ്യം.
യാത്രക്കിടെ ഉപയോഗിക്കുമ്പോള്‍ തണുപ്പ് വിടാതിരിക്കാന്‍ ഇന്‍സുലേറ്റഡ് കവചം ഇതിനുണ്ട്. വൈദ്യുതി ഉപയോഗം കുറയ്ക്കുന്നതിന് വൈകുന്നേരങ്ങളില്‍ ഫ്രിഡ്ജ് ഓഫ് ചെയ്താലും അതിനുള്ളിലെ കൂള്‍-ബിയില്‍ തണുപ്പ് അകലില്ല. പ്ലാസ്റ്റിക് കുപ്പിയില്‍ വെള്ളംനിറച്ച് തണുപ്പിക്കാന്‍ ഫ്രിഡ്ജില്‍ വയ്ക്കുമ്പോള്‍ വൈദ്യുതി ഉപയോഗം അധികമാണ്. ശീതളപാനീയങ്ങള്‍ക്ക് ഫ്രിഡ്ജ് ഉപയോഗിക്കുന്നവര്‍ കൂള്‍-ബി പ്രയോജനപ്പെടുത്തിയാല്‍ മാസം എട്ട് യൂണിറ്റ് വരെ വൈദ്യുതി ലാഭിക്കാമെന്ന് ബൈജു പറഞ്ഞു.
ഇടത്തരം വലിപ്പത്തിലെ കൂള്‍-ബി ഏതാനുംമാസം മുമ്പ് സ്വയംനിര്‍മിച്ച് ഫലപ്രദമായി വീട്ടില്‍ ഉപയോഗിക്കുന്നുവെന്നും അദ്ദേഹം പറഞ്ഞു. 600 രൂപയാണ് നിര്‍മാണച്ചെലവ്. വാണിജ്യാടിസ്ഥാനത്തില്‍ നിര്‍മിച്ചാല്‍ ചെലവ് ഗണ്യമായി കുറയ്ക്കാം.
കെ.എസ്.ഇ.ബി ആസ്ഥാനത്ത്(തിരുവന്തപുരം വൈദ്യുതിഭവന്‍) റിന്യൂവബിള്‍ എനര്‍ജി ചീഫ് എന്‍ജിനിയറുടെ കീഴിലുള്ള ഗവേഷണ വിഭാഗത്തില്‍ ജോലിനോക്കുന്ന ബൈജു ഇതിനകം 35ല്‍പരം കണ്ടുപിടിത്തങ്ങള്‍ നടത്തി. ഊര്‍ജസംരക്ഷണം വിഷയമാക്കിയുള്ള കവിതകളുടെയും ഗാനങ്ങളുടെയും രചയിതാവാണ് ചേര്‍ത്തല പട്ടണക്കാട് വിസ്മയം വീട്ടില്‍ കെ സി ബൈജു. ഭാര്യ: അശ്വതി(വൈക്കം ആശ്രമം സ്‌കൂള്‍ അധ്യാപിക). മകന്‍: അക്ഷയ്(പട്ടണക്കാട് പബ്ലിക് സ്‌കൂള്‍ വിദ്യാര്‍ഥി).