ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ ചെല്‍സി കുതിപ്പ് തുടരുന്നു. സണ്ടര്‍ലാന്‍ഡിനെ 1-0ത്തിനു കീഴടക്കി പോയിന്റ് പട്ടികയില്‍ വ്യക്തമായ മുന്‍തൂക്കമാണ് അവര്‍ സ്വന്തമാക്കിയത്. മറ്റു മത്സരങ്ങളില്‍ മാഞ്ചസ്റ്റര്‍ യുനൈറ്റഡ്, മാഞ്ചസ്റ്റര്‍ സിറ്റി, ലിവര്‍പൂള്‍, ടോട്ടനം ടീമുകളും വിജയിച്ചു.
സെസ്‌ക് ഫാബ്രിഗസിന്റെ ഒറ്റ ഗോളിലാണ് ചെല്‍സിയുടെ വിജയം. മാഞ്ചസ്റ്റര്‍ യുനൈറ്റഡ് 2-1നു ക്രിസ്റ്റല്‍ പാലസിനേയും മാഞ്ചസ്റ്റര്‍ സിറ്റി 2-0ത്തിനു വാട്‌ഫോര്‍ഡിനേയും ലിവര്‍പൂള്‍ 3-0ത്തിനു മിഡ്ഡ്ല്‍സ്‌ബ്രോയേയും ടോട്ടനം ഇതേ സ്‌കോറിനു ഹള്‍ സിറ്റിയേയും കീഴടക്കി. ജയത്തോടെ 16 മത്സരങ്ങളില്‍ നിന്നു ചെല്‍സിക്ക് 40 പോയിന്റ്. ആറു പോയിന്റ് വ്യത്യാസത്തില്‍ ലിവര്‍പൂളും ആഴ്‌സണലും 34 പോയിന്റുകളുമായി രണ്ടും മൂന്നും സ്ഥാനത്ത്. 33 പോയിന്റുകളുമായി മാഞ്ചസ്റ്റര്‍ സിറ്റി നാലാമതും 30 പോയിന്റുമായി ടോട്ടനം അഞ്ചാമതും 27 പോയിന്റുകളുമായി മാഞ്ചസ്റ്റര്‍ യുനൈറ്റഡ് ആറാം സ്ഥാനത്തും നില്‍ക്കുന്നു.

ക്ലബ് ലോകകപ്പ്: റയല്‍
മാഡ്രിഡ്- കഷിമ
അന്റലേര്‍സ് പോരാട്ടം
യോകോഹാമ: സ്പാനിഷ് കരുത്തരായ റയല്‍ മാഡ്രിഡ് ക്ലബ് ലോകകപ്പിന്റെ ഫൈനലിലേക്ക് മുന്നേറി. കോണ്‍കാകാഫ് ചാംപ്യന്‍സ് ലീഗ് ജേതാക്കളായ മെക്‌സിക്കന്‍ ടീം ക്ലബ് അമേരിക്കയെ 2-0ത്തിനു കീഴടക്കിയാണ് യുവേഫ ചാംപ്യന്‍മാരായ റയല്‍ കലാശപ്പോരിനര്‍ഹരായത്. കൊളംബിയന്‍ ക്ലബ് അത്‌ലറ്റിക്കോ നാഷണലിനെ 3-0ത്തിനു പരാജയപ്പെടുത്തി ജപ്പാന്‍ ക്ലബ് കഷിമ അന്റലേര്‍സും ഫൈനലിലെത്തി. 18നു നടക്കുന്ന കിരീട പോരാട്ടത്തില്‍ റയല്‍ കഷിമയുമായി ഏറ്റുമുട്ടും. റയലിനായി 45ാം മിനുട്ടില്‍ കരിം ബെന്‍സമയും 90ാം മിനുട്ടില്‍ ക്രിസ്റ്റ്യാനോ റൊണാള്‍ഡോയും വല ചലിപ്പിച്ചു. 2014ല്‍ നടാടെ കിരീടം നേടിയ റയല്‍ രണ്ടാം ക്ലബ് ലോകകപ്പാണ് ലക്ഷ്യമിടുന്നത്.