പാനൂര്‍: പാനൂര്‍ പൊലിസ് കണ്‍ട്രോള്‍ റൂമിലെ കട്ടപുറത്തായ വാഹനങ്ങള്‍ക്ക് ഒടുവില്‍ ശാപമോക്ഷം.
ലക്ഷങ്ങള്‍ വിലമതിക്കുന്ന ആറ് ടവേര വാഹനങ്ങള്‍ കട്ടപുറത്തായ കാര്യം കഴിഞ്ഞ ദിവസം സുപ്രഭാതം റിപ്പോര്‍ട്ട് ചെയ്തിരുന്നു. വാര്‍ത്ത ശ്രദ്ധയില്‍ പെട്ടതിനെ തുടര്‍ന്ന് തലശ്ശേരി ഡി.വൈ.എസ്.പി.പ്രിന്‍സ് എബ്രഹാം മുന്‍കയ്യെടുത്താണ് വാഹനങ്ങളുടെ റിപ്പയര്‍ ചെയ്യാനൊരുങ്ങുന്നത്. ജില്ലാ പൊലിസ് ചീഫിന്റെ അനുമതിയോടെ ഇക്കാര്യത്തില്‍ അടിയന്തര നടപടി കൈകൊള്ളുമെന്ന് ഡി.വൈ.എസ്.പി. പറഞ്ഞു. കോഴിക്കോട് സര്‍വീസ് സെന്ററില്‍ കണ്ണൂര്‍ പൊലിസ് ഭീമമായ തുക കുടിശ്ശികയായതിനെ തുടര്‍ന്ന് സര്‍വീസ് നടത്താനാകില്ലെന്ന് ഉടമ നിലപാടെടുത്തതോടെയാണ് കണ്‍ട്രോള്‍ റൂമിന്റെ ആറ് വാഹനങ്ങളും കട്ടപുറത്തായത്. അടിക്കടി സംഘര്‍ഷങ്ങളും സ്‌ഫോടനങ്ങളും അരങ്ങേറുന്ന പാനൂര്‍ മേഖലയില്‍ വാഹനങ്ങളില്ലാത്തത് പൊലിസിനും പ്രയാസങ്ങള്‍ സൃഷ്ടിച്ചിരുന്നു.