പാറശാല: പിതാവിനെ തലയ്ക്കടിച്ചു കൊന്ന മകനെ ഇന്നലെ പാറശാല പൊലിസ് അറസ്റ്റു ചെയ്തു. കാരോട്
വില്ലേജില്‍ ഊരമ്പ് കുഴിഞ്ഞാന്‍വിള താഴെവിള വീട്ടില്‍ തങ്കപ്പനെ (65) തലയ്ക്കടിച്ച് കൊന്ന കേസിലാണ് മകന്‍ പിടിയിലായത്.
കഴിഞ്ഞ ശനിയാഴ്ച രാത്രി 11 മണിയോടെ തങ്കപ്പന്റെ ഇളയ മകനും മദ്യപാനിയും തൊട്ടടുത്ത് താമസക്കാരനുമായ കാരോട് വില്ലേജില്‍ കുഴിഞ്ഞാന്‍വിള താഴെവിള വീട്ടില്‍ സുജി (32) തടി കൊണ്ട് പിതാവായ തങ്കപ്പന്റെ തലയ്ക്കടിച്ച് ഗുരുതരമായി പരുക്കേല്‍പ്പിക്കുകയായിരുന്നു. മര്‍ദ്ദനമേറ്റ പിറ്റേദിവസം തന്നെ തങ്കപ്പന്‍ മരണപ്പെടുകയും ചെയ്തു.
തുടര്‍ന്ന് പ്രതി സുജി ധൃതിയില്‍ തങ്കപ്പന്റെ ശവശരീരം മറവ് ചെയ്യാന്‍ ശ്രമം നടത്തുകയും ചെയ്തു. എന്നാല്‍ വാര്‍ഡ് മെമ്പര്‍ ധനേഷിന്റെയും നാട്ടുകാരുടെയും പാരാതിയെ തുടര്‍ന്ന് പൊലിസ് സ്ഥലത്തെത്തി തുടര്‍ നടപടികള്‍ സ്ഥീകരിക്കുകയായിരുന്നു. പൊലിസ് അന്വേഷണം ഊര്‍ജ്ജിതമാക്കിയപ്പോള്‍ പ്രതിയും മരിച്ച തങ്കപ്പന്റെ മകനുമായ സുജി ഒളിവില്‍ പോകുകയായിരുന്നു.
പ്രതിയെ കുറിച്ചുള്ള അന്വേഷണം പുരോഗമിക്കവേ ഇന്നലെ തമിഴ്‌നാട്ടിലെ കൊല്ലങ്കോട് വച്ച് പാറശാല സി.ഐ ജെ.സന്തോഷ്‌കുമാര്‍, ഗ്രേഡ് എസ്.ഐ തങ്കരാജ് , എസ്.സി.പി.ഒ പ്രേമന്‍, ജസ്റ്റിന്‍ എന്നിവരടങ്ങുന്ന സംഘം പ്രതിയെ അറസ്റ്റ് ചെയ്യുകയായിരുന്നു. തുടര്‍ന്ന് ഇന്നലെ കോടതിയില്‍ ഹാജരാക്കിയ പ്രതിയെ റിമാന്റ് ചെയ്തു.