അരീക്കോട്: പുതുതലമുറയുടെ വിദ്യാഭ്യാസം പ്രമേയമാക്കി ഡല്‍ഹി കേന്ദ്രമായി പ്രവര്‍ത്തിക്കുന്ന ചേംബര്‍ ഓഫ് എജ്യുക്കേഷനും വേള്‍ഡ് മോണ്ടിസോറി കൗണ്‍സിലും സംയുക്തമായി സംഘടിപ്പിച്ച ഏഴാമത് മോണ്ടിസ്സോറി വിദ്യാഭ്യാസ ഉച്ചകോടി അരീക്കോട് ഫഌവര്‍ സിറ്റിയില്‍ അലിഗഢ്മുസ്‌ലിം യൂനിവേഴ്‌സിറ്റി മലപ്പുറം കേന്ദ്രം ഡയറക്ടര്‍ ഡോ. എ നുജൂം ഉദ്ഘാടനം ചെയ്തു. 2017 ലെ പുതിയ അധ്യയനവര്‍ഷം പൂക്കളുടെയും കുട്ടികളുടെയും അന്താരാഷ്ട്ര വര്‍ഷമായി ആചരിക്കുമെന്ന് ഉച്ചകോടിയില്‍ പ്രഖ്യാപിച്ചു. ചേംബര്‍ ഓഫ് എജ്യുക്കേഷന്‍ ഡയറക്ടര്‍ ഡോ. പി.കെ നൗഷാദ് അധ്യക്ഷനായി.
കാലിക്കറ്റ് സര്‍വകലാശാല മുന്‍ മനശാസ്ത്രവിഭാഗം തലവന്‍ ഡോ. ജോണ്‍ ബേബി വേള്‍ഡ് മോണ്ടിസ്സോറി കൗണ്‍സില്‍ ചെയര്‍മാന്‍ മീനാക്ഷി ശിവരാമകൃഷ്ണ എന്നിവര്‍ പ്രമേയങ്ങള്‍ അവതരിപ്പിച്ചു. ഉച്ചകോടിയുടെ ഭാഗമായി സംഘടിപ്പിച്ച ഒരു മാസം നീണ്ടുനില്‍ക്കുന്ന മോണ്ടിസ്സോറി വിദ്യാഭ്യാസ എക്‌സിബിഷന്‍ സാമൂഹ്യപ്രവര്‍ത്തക കാഞ്ചനമാല ഉദ്ഘാടനം ചെയ്തു. പ്രൊഫ. പി.പി അബ്ദുല്‍ റഷീദ്, അഡ്വ. എ.കെ ഇസ്മായില്‍ വഫ, ബേബി ഷക്കീല, വി.പി നജ്‌ന പ്രബന്ധങ്ങള്‍ അവതരിപ്പിച്ചു. 2017 ജനുവരി 7ന് ഇന്ത്യക്കകത്തും പുറത്തുമുള്ള പ്രമുഖവിദ്യാഭ്യാസ വിചക്ഷണരും ഗവേഷകരും പങ്കെടുക്കുന്ന അന്താരാഷ്ട്ര മോണ്ടിസ്സോറി വിദ്യാഭ്യാസ സെമിനാറില്‍ സംസ്ഥാനത്തെ തെരഞ്ഞെടുത്ത മോണ്ടിസ്സോറി അധ്യാപകര്‍ക്കും വിദ്യാര്‍ഥികള്‍ക്കും വിദ്യാഭ്യാസ പ്രവര്‍ത്തകര്‍ക്കും പങ്കെടുക്കാം. ഫോണ്‍: 8592813331.