മാള: സ്വകാര്യ മൊബൈല്‍ ദാതാക്കളുടെ മൊബൈല്‍ ടവറില്‍ നിന്നും ബാറ്ററി മോഷ്ടിച്ച് കടത്തുകയായിരുന്ന രണ്ടുപേരെ മാള പൊലിസ് പിടികൂടി റിമാന്‍ഡ് ചെയ്തു. തൃശൂര്‍ മരത്താക്കര പുളിക്കല്‍ പി.ഡി സലേഷ്(40), കുന്നംകുളം വടക്കേത്തലക്കല്‍ വി.ടി ജെയ്‌സണ്‍(30) എന്നിവരെയാണ് ചാലക്കുടി ഫസ്റ്റ് ക്ലാസ് മജിസ്‌ട്രേറ്റ് കോടതിയില്‍ ഹാജരാക്കി റിമാന്‍ഡ് ചെയ്തത്. കഴിഞ്ഞ ദിവസം കൊമ്പൊടിഞ്ഞാമാക്കല്‍ ജങ്ഷനില്‍ നടന്ന വാഹന പരിശോധനക്കിടെയാണ് പെട്ടി ഓട്ടോയില്‍ കടത്തുകയായിരുന്ന ഉയര്‍ന്ന ശേഷിയുള്ള 16 ബാറ്ററികളടക്കം പ്രതികള്‍ മാള പൊലിസിന്റെ പിടിയിലായത്. വടക്കാഞ്ചേരിയില്‍ നിന്നും 12 ബാറ്ററികളും കൊമ്പൊടിഞ്ഞാമാക്കലില്‍ നിന്നും നാല് ബാറ്ററികളുമാണ് പ്രതികള്‍ മോഷ്ടിച്ചത്. പതിനായിരം രൂപയോളം ഒരു ബാറ്ററിക്ക് വില വരുമെങ്കിലും കിട്ടിയ വിലക്കാണിവര്‍ വിറ്റു വന്നിരുന്നത്. മാള എസ്.ഐ കെ.ശ്രീജിത്തിന്റെ നേതൃത്വത്തിലുള്ള പൊലിസാണ് തൊണ്ടിമുതല്‍ സഹിതം പ്രതികളെ കസ്റ്റഡിയിലെടുത്തത്.