കൊച്ചി: ഐ.എസ്.എല്‍ മൂന്നാം സീസണിലെ കേരള ബ്‌ളാസ്‌റ്റേഴ്‌സിന്റെ മലയാളി താരം മുഹമ്മദ് റാഫി കളിക്കൊപ്പം ബിസിനസ് രംഗത്തേക്കും. കേരള ബ്‌ളാസ്റ്റേഴ്‌സിന്റെ മലയാളി താരങ്ങളുടെ പിന്തുണയോടെയാണ് മുഹമ്മദ് റാഫി പുതിയ സംരംഭത്തിന് കൊച്ചിയില്‍ തുടക്കം കുറിച്ചത്.
ലോകോത്തര ബ്രാന്‍ഡുകളുടെ നിര്‍മാണ സാമഗ്രികള്‍ ഒരു കുടക്കീഴില്‍ ലഭ്യമാക്കി അല്‍ അമാന്‍ ബില്‍ഡ് മാര്‍ട്ട് പ്രൈവറ്റ് ലിമിറ്റഡ് ഷോറൂമാണ് റാഫ് വൈസ് ചെയര്‍മാനും കടന്നപ്പള്ളി മൊയ്തു ഹാജി ചെയര്‍മാനുമായി പ്രവര്‍ത്തനമാരംഭിക്കുന്നത്. പുതിയ സംരംഭത്തിന്റെ ലോഗോ പ്രകാശനം കൊച്ചിയില്‍ നടന്ന ചടങ്ങില്‍ ഐ.എസ്.എല്‍ താരങ്ങളായ മുഹമ്മദ് റാഫിയും സി.കെ വിനീതും റിനോ ആന്റോയും ചേര്‍ന്ന് നിര്‍വഹിച്ചു. തനിക്ക് പിന്നാലെ ബിസിനസിലേക്ക് സി.കെ വിനീതും റിനോയും കൂടി എത്തുമെന്നും ഇരുവരെയും സംരംഭത്തിലേക്ക് ക്ഷണിച്ചിട്ടുണ്ടെന്നും റാഫി പറഞ്ഞു.
തുടക്കത്തില്‍ കണ്ണൂര്‍ ജില്ലയിലെ പഴയങ്ങാടിയില്‍ ആരംഭിക്കുന്ന ഷോറൂം തുടര്‍ന്ന് കേരളത്തില്‍ കൊച്ചിയുള്‍പ്പെടെയുള്ള പ്രധാന നഗരങ്ങളിലേക്ക് വ്യാപിപ്പിക്കും. അഞ്ച് നിലകളിലായി 10,000 ത്തോളം ച.അടി. വിസ്തീര്‍ണമുള്ള ഷോറൂമിലാണ് ലോകോത്തര ബ്രാന്‍ഡുകള്‍ ഒരു കുടക്കീഴില്‍ അണിനിരത്തിയിരിക്കുന്നത്. മലബാറില്‍ ആദ്യമായാണ് ഇത്തരമൊരു സംരംഭമെന്ന് മുഹമ്മദ് റാഫി, ഡയറക്ടര്‍ മുഹമ്മദ് ബഷീര്‍ പെരുമ്പ പറഞ്ഞു.