മട്ടാഞ്ചേരി: ഒന്‍പതാം ക്ലാസുകാരനെ മാരുതി ഓമ്‌നി വാനിലെത്തിയ സംഘം ബലം പ്രയോഗിച്ച് കാറില്‍ കടത്തിക്കൊണ്ടു പോകാന്‍ ശ്രമിച്ചെന്നു പരാതി. തിങ്കളാഴ്ച വൈകിട്ട് 4.30ഓടെ തോപ്പുംപടിയിലാണ് സംഭവം.
പ്യാരി ജംങ്ഷനു സമീപം പള്ളിച്ചാല്‍ റോഡില്‍ ഈഴ മുറി പറമ്പില്‍ ജിനേന്ദ്രന്റെ മകന്‍ അക്ഷയ് (15)നെയാണ് സംഘം ചേര്‍ന്ന് പിടിച്ചു കൊണ്ടു പോകാന്‍ ശ്രമിച്ചത്. ട്യൂഷന്‍ ക്ലാസ്സിലേക്ക് പോകും വഴി കൊച്ചു പള്ളി റോഡില്‍ അഞ്ജലി കല്ല്യാണമണ്ഡപത്തിന് പടിഞ്ഞാറു ഭാഗം വെച്ച് ഓമ്‌നി വാനിലെത്തിയവര്‍ ആദ്യം വഴി ചോദിച്ചതായി പറയുന്നു.
പിന്നീട് ഒരാള്‍ പിന്നില്‍ വന്ന് പിടിക്കുകയും മറ്റൊരാള്‍ തുണികൊണ്ട് മുഖം പൊത്തുകയും ചെയ്തതായി കുട്ടി പറയുന്നു.
പിന്നീട് കാറിലെത്തിയ നാലുപേരേയും തള്ളി മാറ്റി കുതറി ഓടുകയായിരുന്നു. പിന്‍തുടര്‍ന്ന സംഘത്തെ കണ്ട് ഭയന്ന കുട്ടി വാലുമ്മല്‍ ജംങ്ഷനു സമീപത്തെ ഒരു ഒഴിഞ്ഞ വീട്ടില്‍ കയറി ഒളിച്ചിരിക്കുകയാരിന്നു. പിന്നീട് കൂട്ടുകാരന്റെ വീട്ടില്‍ നിന്നും ഫോണ്‍ ചെയ്ത് വീട്ടുകാരെ വരുത്തിയ ശേഷം തോപ്പുംപടി പൊലിസില്‍ പരാതി നല്‍കി.
അതേസമയം കുട്ടിയുടെ മൊഴി രേഖപ്പെടുത്തി അന്വേഷണം ആരംഭിച്ചതായി തോപ്പുംപടി എസ്.ഐ സി വിനു പറഞ്ഞു. സമീപത്തെ സി.സി കാമറകള്‍ പരിശോധനകള്‍ക്കു വിധേയമാക്കിയ ശേഷമാകും കൂടുതല്‍ അന്വേഷണങ്ങള്‍ നടത്തുകയെന്നും അദ്ദേഹം പറഞ്ഞു.