വാടാനപ്പള്ളി: ഹരിത സമൃദ്ധി സൊസൈറ്റിയുടെ നേതൃത്വത്തില്‍ തളിക്കുളത്ത് ജൈവ പച്ചക്കറി കൃഷിക്ക് തുടക്കം കുറിക്കുന്നു. 24ന് രാവിലെ എട്ടിന് ചലച്ചിത്ര താരം സലിംകുമാര്‍ പാടത്ത് വിത്ത് നട്ട് ഉദ്ഘാടനം ചെയ്യും.
തളിക്കുളം പഞ്ചായത്തിലെ 13ാം വാര്‍ഡില്‍ തളിക്കുളങ്ങര ക്ഷേത്ര പരിസരത്തെ പാടത്താണ് ജൈവ പച്ചക്കറി കൃഷിക്ക് തുടക്കം കുറിക്കുന്നത്. തളിക്കുളത്തെ ജൈവ കാര്‍ഷിക ഗ്രാമമാക്കി മാറ്റുക എന്ന ലക്ഷ്യത്തോടെ രൂപീകരിച്ച ഹരിത സമൃദ്ധി സൊസൈറ്റിയില്‍ 500 വനിതാ അംഗങ്ങളുണ്ട്. അംഗങ്ങള്‍ കൃഷി ചെയ്ത് ഉല്‍പാദിപ്പിക്കുന്ന ഉല്‍പന്നങ്ങള്‍ വില്‍ക്കുന്നതിന് നാട്ടുപച്ച എന്ന വിപണന കേന്ദ്രവും സൊസൈറ്റിയുടെ നേതൃത്വത്തില്‍ തളിക്കുളത്ത് പ്രവര്‍ത്തിക്കുന്നുണ്ട്. സംസ്ഥാനത്തെ മികച്ച ജൈവ കര്‍ഷകരുടെ ഉപദേശ നിര്‍ദേശ പ്രകാരം കൂടുതല്‍ സ്ഥലങ്ങളില്‍ ജൈവ പഴം, പച്ചക്കറി കൃഷികള്‍ക്കും തുടക്കം കുറിക്കുമെന്ന് പരിത സമൃദ്ധി സൊസൈറ്റി ചെയര്‍മാന്‍ ടി.എന്‍ പ്രതാപന്‍ അറിയിച്ചു.