കോതമംഗലം/കൊച്ചി: കോതമംഗലം എം.എ കോളജ് ആതിഥേയത്വം വഹിക്കുന്ന എം.ജി സര്‍വകലാശാല മീറ്റിന് ഹാഫ്മാരത്തോണ്‍ മത്സരങ്ങളോടെ തുടക്കമായി. പുരുഷ വനിത ഹാഫ്മാരത്തോണും സ്റ്റീപ്പിള്‍ ചെയ്‌സ് മത്സരങ്ങളുമാണ് ആദ്യ ദിവസം അരങ്ങേറിയത്.
വനിതകളുടെ മാരത്തോണില്‍ ചങ്ങനാശ്ശേരി അസംപ്ഷന്‍ കോളജിലെ ഒ.പി ജയ്ഷ ഒന്നാം സ്ഥാനവും അസംപ്ഷനിലെ തന്നെ ജോത്സന ജോര്‍ജ് രണ്ടാം സ്ഥാനവും പാല അല്‍ഫോണ്‍സ കോളജിലെ ഗോപിക ആര്‍.നായര്‍ മൂന്നാം സ്ഥാനവും കരസ്ഥമാക്കി. പുരുഷ വിഭാഗത്തില്‍ എസ്.ബി കോളജിലെ വൈ. സാബി ഒന്നാം സ്ഥാനവും കോതമംഗലം എം.എ കോളജിലെ ടിബിന്‍ ജോസഫ് രണ്ടാം സ്ഥാനവും കാഞ്ഞിരപ്പിള്ളി എസ്.ഡി കോളജിലെ സാജന്‍ പി. കുര്യാക്കോസ് മൂന്നാംസ്ഥാനവും കരസ്ഥമാക്കി.
എറണാകുളം മഹാരാജാസ് കോളജ് ഗ്രൗണ്ടില്‍ നടന്ന സ്റ്റീപ്പിള്‍ ചെയ്‌സ് മത്സരത്തില്‍ പാല അല്‍ഫോണ്‍സ കോളജിലെ എയ്ഞ്ചല്‍ ജയിംസ് വനിത വിഭാഗത്തിലും ഉഴവൂര്‍ സെന്റ് സ്റ്റീഫന്‍സിലെ ബീനു പീറ്ററുമാണു പുതിയ മീറ്റ് റെക്കോര്‍ഡുകള്‍ തിരുത്തിയത്. വനിത വിഭാഗത്തില്‍ പാല അല്‍ ഫോണ്‍സയുടെ തന്നെ എം.സ് ശ്രുതിയും ചങ്ങനാശ്ശേരി അസംപ്ഷന്റെ കെ.എല്‍. കൊച്ചുത്രേസ്യ മൂന്നാംസ്ഥാനവും കരസ്ഥമാക്കി.
പുരുഷ വിഭാഗത്തില്‍ എസ്.ബി ചങ്ങനാശ്ശേരിയുടെ ക്രിസ്റ്റ്യന്‍ വില്‍സണും അഭിജിത്ത് ആന്റണിയും രണ്ടും മൂന്നും സ്ഥാനങ്ങള്‍ കരസ്ഥമാക്കി.