ദുബൈ: പ്രവാസികളുടെ നിക്ഷേപങ്ങള്‍ പ്രോല്‍സാഹിപ്പിക്കുന്നതിനായി പ്രവാസി നിക്ഷേപ സഹായ സെല്ലും പ്രമുഖ വ്യവസായികളെ ഉള്‍പ്പെടുത്തി പ്രവാസി നിക്ഷേപ കൗണ്‍സിലും രൂപീകരിക്കുമെന്നു മുഖ്യമന്ത്രി പിണറായി വിജയന്‍ വ്യക്തമാക്കി.

എമിറേറ്റസ് ടവറില്‍ ദുബൈ സ്മാര്‍ട്ട് സിറ്റി നടത്തിയ ബിസിനസുകാരുടെ സംഗമത്തില്‍ സംസാരിക്കുകയായിരുന്നു അദ്ദേഹം.

കേരളത്തിന്റെ വികസനത്തിനു വന്‍തോതില്‍ സഹായം നല്‍കിയ പ്രവാസികളെ വിസ്മരിക്കാനാവില്ല. പ്രവാസികളുടെ നിക്ഷേപത്തിന് സര്‍ക്കാര്‍ ഗ്യാരന്റി നല്‍കുമെന്ന് മുഖ്യമന്ത്രി വ്യക്തമാക്കി.

ഉടന്‍ തന്നെ പ്രഖ്യാപിക്കുന്ന പുതിയ വ്യവസായ നയത്തില്‍ എകജാലക സംവിധാനം നടപ്പിലാക്കുമെന്നും ഇതിലൂടെ വ്യവസായങ്ങള്‍ തുടങ്ങുന്നതിനുള്ള കാത്തിരിപ്പ് അവസാനിപ്പിക്കാനാവുമെന്നും അദ്ദേഹം പറഞ്ഞു.

എമിറേറ്റസ് ടവറില്‍ നടന്ന ചടങ്ങ് യു.എ.ഇയിലെ ഇന്ത്യന്‍ സ്ഥാനപതി നൗദീപ് സിങ് ഉദ്ഘാടനം ചെയ്തു. ജോണ്‍ ബ്രിട്ടാസ് പരിപാടിയുടെ മോഡറേറ്ററായിരുന്നു.

ആദ്യ സന്ദര്‍ശനത്തിന്റെ ഭാഗമായി പ്രവാസികള്‍ ഏറെ പ്രതീക്ഷയിലാണ്. ദുബായിലെ അല്‍ ഖൂസിലെ ഡെല്‍സ്‌കോ ലേബര്‍ ക്യാംപിലും പിണറായി സന്ദര്‍ശനം നടത്തിയിരുന്നു. ഏറെ ആഘോഷത്തോടെയാണ് ഇവിടെ മുഖ്യമന്ത്രിയെ വരവേറ്റത്. പ്രവാസികള്‍ക്കായി ചില പ്രഖ്യാപനങ്ങള്‍ ഉണ്ടാകുമെന്നും പ്രവാസികളോട് കരുതലുള്ള സര്‍ക്കാറായിരിക്കും ഇതെന്നും പിണറായി ക്യാംപ് സന്ദര്‍ശനത്തിനിടെ വ്യക്തമാക്കുകയും തൊഴിലാളികളോട് സംവദിക്കുകയും ചെയ്തിരുന്നു. മൂന്നു ദിവസത്തെ സന്ദര്‍ശനത്തിനെത്തിയ മുഖ്യമന്ത്രി നാളെ തിരിച്ചു പോകും.