വാരാണസി: സഹാറാ ഗ്രൂപ്പില്‍നിന്ന് കോഴ വാങ്ങിയെന്ന ആരോപണത്തിന് വ്യക്തമായ മറുപടി പറയാതെ കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിയെ പരിഹസിച്ച് പ്രധാനമന്ത്രി നരേന്ദ്രമോഡി.
രാഹുല്‍ ഗാന്ധി പ്രസംഗിക്കാന്‍ പഠിച്ചു തുടങ്ങിയതില്‍ അതിരില്ലാത്ത സന്തോഷമുണ്ടെന്ന് പറഞ്ഞ മോദി കോഴയെ സംബന്ധിച്ച് പ്രതികരിക്കാന്‍ തയാറായില്ല. രാഹുല്‍ പറഞ്ഞ ഭൂകമ്പം ഇതുവരെയുണ്ടായില്ലെന്നും പ്രധാനമന്ത്രി ഓര്‍മ്മിപ്പിച്ചു.
വാരാണസിയില്‍ ബനാറസ് ഹിന്ദു സര്‍വകലാശാലയില്‍ നടന്ന ഒരു പരിപാടിയില്‍ സംസാരിക്കുകയായിരുന്നു അദ്ദേഹം. രാഹുലിന്റെ പേര് നേരിട്ട് പരാമര്‍ശിക്കാതെയായിരുന്നു മോദിയുടെ പരിഹാസം.
രാഹുല്‍ മിണ്ടാതിരുന്നെങ്കില്‍ ജനങ്ങള്‍ 10 കൊല്ലം വരെ സഹിക്കേണ്ടി വരുന്ന ഒരു ഭൂകമ്പം ഉണ്ടാകുമായിരുന്നെന്നും മോദി പറഞ്ഞു. നരേന്ദ്ര മോദിക്കെതിരെ വ്യക്തിപരമായി അഴിമതി ആരോപണം ഉന്നയിച്ച രാഹുല്‍ ഗാന്ധി, താനത് വെളിപ്പെടുത്തിയാല്‍ ഭൂകമ്പമുണ്ടാകുമെന്ന് പറഞ്ഞിരുന്നു. പിന്നാലെ കഴിഞ്ഞ ദിവസം സഹാറ, ബിര്‍ള കമ്പനിളില്‍ നിന്ന് കോടികള്‍ നരേന്ദ്ര മോദി കോഴ വാങ്ങിയതായി ആരോപണം ഉന്നയിച്ചിരുന്നു. ഇതിന് പിന്നാലെയാണ് രാഹുല്‍ ഗാന്ധിയെ പരിഹസിച്ച് മോദി സംസാരിച്ചത്.
മുന്‍പ്രധാനമന്ത്രി മന്‍മോഹന്‍ സിങ്ങിനേയും മോദി വിമര്‍ശിച്ചു.  
ഒരു ദശാബ്ദക്കാലത്തിലധികമായി സാമ്പത്തിക വ്യവസ്ഥയെ നിയന്ത്രിച്ച മന്‍മോഹന്‍ സിങ് ഒന്നും ചെയ്തില്ല. കള്ളപ്പണക്കാരെ സംരക്ഷിക്കാനാണ് പ്രതിപക്ഷം ശ്രമിക്കുന്നത്.
രാജ്യത്തെ 125 കോടി ഇന്ത്യക്കാരില്‍ എനിക്ക് വിശ്വാസമുണ്ട്. സര്‍ക്കാര്‍ നടത്തുന്ന ശുചിയാക്കല്‍ യജ്ഞമാണ് നോട്ട് അസാധുവാക്കലിലൂടെയുള്ള കള്ളപ്പണം തടയല്‍. രാജ്യത്തെ യുവാക്കള്‍ ഓണ്‍ലൈന്‍ ബാങ്കിങ്ങിലേക്ക് നീങ്ങണമെന്നും മോദി ആവശ്യപ്പെട്ടു.
.