പേരൂര്‍ക്കട: പിണറായി വിജയന്റെ നേതൃത്വത്തിലുള്ള ഭരണം പഴയ സി.പിയുടെ കാലത്തെ ഭരണത്തെയാണ് ഓര്‍മിപ്പിക്കുന്നതെന്നും ഇക്കണക്കിനു പോയാല്‍ പിണറായി സി.പിയെ കടത്തിവെട്ടുമെന്നും കെ.പി.സി.സി പ്രസിഡന്റ് വി.എം സുധീരന്‍ . വട്ടിയൂര്‍ക്കാവ് സ്റ്റേറ്റ് കോണ്‍ഗ്രസ് സമ്മേളനത്തിന്റെ 78-ാം വാര്‍ഷികവുമായി ബന്ധപ്പെട്ട് വട്ടിയൂര്‍ക്കാവ് സമ്മേളന സ്മാരകസമിതിയുടെ ആഭിമുഖ്യത്തില്‍ നടത്തിയ വാര്‍ഷികാഘോഷം ഉദ്ഘാടനം ചെയ്യുകയായിരുന്നു അദ്ദേഹം.
ജനങ്ങളെ ബുദ്ധിമുട്ടിക്കുന്നതില്‍ മോദിയും പിണറായിയും തമ്മില്‍ കടുത്ത മത്സരം നടക്കുന്നുവെന്നും അദ്ദേഹം ആരോപിച്ചു. സമിതി പ്രസിഡന്റ് കാവല്ലൂര്‍ മധു അധ്യക്ഷനായി. യോഗത്തില്‍ സ്വതന്ത്ര്യസമര സേനാനികളെ ആദരിച്ചു. ഡോ. ശശി തരൂര്‍ എം.പി, തമ്പാനൂര്‍ രവി, എന്‍. പീതാംബരക്കുറുപ്പ്, നെയ്യാറ്റിന്‍കര സനല്‍, വട്ടിയൂര്‍ക്കാവ് ചന്ദ്രശേഖരന്‍ നായര്‍, വാഴോട്ടുകോണം ചന്ദ്രശേഖരന്‍, ശാസ്തമംഗലം മോഹന്‍, ഡി. സുദര്‍ശനന്‍, ഗണേശപിള്ള, എസ്. നാരായണപിള്ള, വി.കെ ഗിരിധരഗോപന്‍, കൊടുങ്ങാനൂര്‍ ഹനീഫ, വി. മധുചന്ദ്രന്‍, വലിയവിള സോമശേഖരന്‍, തൊഴുവന്‍കോട് സുരേന്ദ്രന്‍, കുരുവിക്കാട് ശശി, തോപ്പുമുക്ക് അനില്‍, എം.പി വിജയകുമാര്‍, ഉണ്ണികൃഷ്ണന്‍ നായര്‍, പി. വിനുകുമാര്‍ എന്നിവര്‍ പങ്കെടുത്തു.