ആയൂര്‍: ആയൂരിലേയും സമീപ പ്രദേശങ്ങളിലേയും 32 എപ്പിസ്‌കോപ്പല്‍ ഇടവകകളുടെ ആഭിമുഖ്യത്തില്‍ സംഘടിപ്പിക്കുന്ന സംയുക്ത ക്രിസ്തുമസ് ആഘോഷം 25ന് നടത്തും. വൈകിട്ട് മൂന്നിന് ആയൂര്‍ സെന്റ് ജോര്‍ജ് ലത്തീന്‍ കത്തോലിക്കാ ദേവാലയത്തില്‍ നിന്നും റാലി ആരംഭിക്കും. നൂറുകണക്കിന് വിശ്വാസികളുടെയും ചെണ്ടമേളത്തിന്റെയും ബാന്റുമേളങ്ങളുടെയും അകമ്പടിയോടെയുള്ള ഘോഷയാത്ര ആയൂര്‍ ടൗണിലൂടെ ആയൂര്‍ സെന്റ് മേരീസ് മലങ്കര കത്തോലിക്ക പള്ളിയിലെത്തി സമാപിക്കും. തുടര്‍ന്ന് ക്രിസ്തുമസ് ഗാനശുശ്രൂഷ. അഞ്ചിന് ചേരുന്ന പൊതുസമ്മേളനം ഡോ. ഫിലിപ്പോസ് മാര്‍ ക്രിസോസ്റ്റം വലിയ മെത്രാപ്പോലീത്ത ഉദ്ഘാടനം ചെയ്യും. മുഖ്യ രക്ഷാധികാരി ഫാ.ജോസ് വിരുപ്പേല്‍ അധ്യക്ഷനാവും. കാരാളികോണം അല്‍-ഹാഫിള്‍ അഹമ്മദ് കബീര്‍ ബാഖവിയും വര്‍ക്കല ശിവഗിരിമഠം സച്ചിദാനന്ദ സ്വാമിയും പ്രഭാഷണങ്ങള്‍ നടത്തും. ജനറല്‍ കണ്‍വീനര്‍ ഡോ. വര്‍ക്കി ആറ്റുപുറത്ത്, ഉപരക്ഷാധികാരി കെ.ജി ജേക്കബ് പണിക്കര്‍, സംയുക്ത ക്രിസ്തുമസ് ആഘോഷസമിതി സെക്രട്ടറി സി ബേബി എന്നിവര്‍ സംസാരിക്കും.